4066/2023-2024

Lawngtlai dated 7th March 2024: Vawiin khan LADC Conference Hall, Lawngtlaiah Administrative Training Institute leh Mizoram Consumers’ Union tangkawp buatsaihin ‘Consumer Awareness Campaign’ neih a ni a. Pu Mark Lalthanliana, Joint Director, ATI chuan hun kaihruaiin Young Lai Association, Lai Women Association, Lawngtlai District Merchant Association member-te an tel a ni.

Pu Mark Lalthanliana, Joint Director chuan Consumer-te dikna chanvo inhrilhhriat leh humhalh chu ‘Consumer Awareness Campaign’ tum ber a nih thu sawiin heng dikna chanvo hriatna hian dik lo tak a thil zuartute huangtau lutuk tur a vengin dik lo tak a tiluite hremna hmanraw tangkai tak a nih thu a sawi a. Consumer-te dikna chanvo leh humhalhna dan hrang hrangte chu a tak a hmang ngamtu ni turin leh hemi kawng a midangte zirtirtu ni zel turin kalkhawmte a chah a ni.

Pu C.Laldawngliana, Vice President, MCU General Headquarters chuan Consumer-te chanvo chungchangah zirtirna pein dawr hrang hranga Maximum Retail Price aia sang a thil zawrh phal a nih loh thu te, LPG leh thil dang buk tling lo a hralh chu dan phal loh a nih thu te sawiin Sawrkar hnuai a Service hrang hrang hman man kan chawi dan te pawh chik tak a enpui thin a pawimawh thu a sawi a. Electric Bill, Tui Bill leh LPG man bithliah leh chhut dan entirna neiin lungawi lohna neite tan hma lak dan tur te a tarlang bawk a ni. 

He hun ah hian Pi Doris Lalrinawmi, SDC chuan thil dik lo tituten an phu tawk hremna an hmuh ngei theih nan Social media hrang hranga thehdarh ai chuan dan ang tak a thuneitute hnen a thlen hmasak a pawimawh thu a sawi. He hun ah hian PHED, Lawngtlai Watsan Division, District Civil Supply Office, District Information & Public Relation Office, Legal Metrology-a thawktuten telpuiin zawhna leh chhanna hun te hman a ni.