4065/2023-2024

Hnahthial the 7th March 2024: Kumin Lok Sabha MP inthlan lo thleng tur inbuatsaihna chu ngawrh taka kalpui mek zel niin vawiin khan South Tuipui biala Electronic Voting Machine (EVM) hman tur lo thlen belhte chu DC Conference Hall-ah endikna (first level checking) neih a ni.

Kumin inthlanna a hman tur EVM tam zawk endikna chu February ni 13-14, 2024 khan neih a lo ni tawh a, vawiina EVM lo thlen belh endikte hi Control Unit 10 niin a siamtu Electronics Corporation of India Limited (ECIL) engineer pahnih hova endik a ni. Election official-te leh political party hrang hrang aiawh kalkhawmte hmuh laiin endik an ni a, vote thlak chhinnate neih niin endikna paltlangte hi inthlan huna hman atan uluk takin strong room-ah kalh hnan zel an ni.