Vawiin khan Seminar Hall, Department of Education, Mizoram University-ah Social Welfare Minister Dr K. Beichhua chuan Mizoram Social Defence & Rehabilitation Board( MSD&RB), Social Welfare Department(SWD) leh Psychology Department, MZU te tangkawpin Mizoram University zirlaite puala ruihlo hmansualna laka lo invenlawk dan zirhona  chi hnih a buatsaih chu a hawng a. Training hmasa zawk chu vawiina neih tak, One day Awareness Programme on Drug Abuse Prevention for University Students  hi a ni a. A pahnihna chu hun remchangah MZU-ah hian la hman leh tur a ni. Heng training buatsaih te  hi Ministry of Social Justice & Empowerment hnuaia National Plan for Drug Demand Reduction (NAPDDR) kaltlanga hmalakna pakhat a ni.

SWD Minister Dr K. Beichhua chuan Mizoram chu state ralmual ber pakhat leh hmun nuam tak a nih rualin  lawmna tikimlo tu chu  chhunga cheng mi tlem te, nuai 11 bawr vel zingah ruihlo ngai leh ruihlo taksa inchiu lut thin an awm tam ta lutuk hi a ni a ti  a. Hei hi thil pawi tak, mi zawng zawngin kan ngaihmawh leh kan do tlan tur a ni a ti. Ruihlo avanga kan harsatna te sutkian tumin mi tlawmngai ten theihtawp an chhuah thin a. Amaherawh chu zirchianna leh behchhan mumal tak, scientific approach a la awm hma a nih avangin kan dinhmun chiang tak hriat leh sawt zawka hmalak chu thil har a ni thin tih a sawi a. Kum 2017 khan Sawrkar chuan chiangkuang taka ruihlo khawihte dinhmun, bul an tan chhoh dan, a nghawng dan bakah Mizoram pum huapa a darh zau dante zirna Baseline Assessment a nei a. Mithiam ten a hmuhchhuah tak chu  Ruihlo ngai zinga a tam ber te chuan tleirawl Kum  15 chho an nih atangin phalna neia zawrh ruihlo - Vaihlo leh hnim chi angte in bul an tan a. Kum hnih thum hnuah Zu,Ganja leh a dangte an ching chhova. Kum 19, 20 an nih meuh chuan Ruihlo hlauhawm zawk, damdawi dawra zawrh leh a ruka zawrh - prescription drug, heroin,Proxyvon, No.4 leh a dang te an ei in bakah  inchiu nan an hmang der tawh thin a ni a ti. He zirchianna hi ruihlo avanga kan harsatnate sutkian kawngah nasa takin a tangkai dawn a. Ruihlo laka him lo rual te, chhan tur rual, zirtir tur rual, ven ngai rual leh hmalak dan tur thlengin a hriat theih dawn a. High school atanga University thlengin Ruihlo laka invendan leh a thatlohna te nasa zawka kan inzirtir chuan ruihlo avanga buaina hi a ziaawm sawt dawn a ni a ti.

Ruihlo laka thalaite venhim sawrkar in a ngai pawimawh tih sawiin Awareness Campaign pawh nasa zawka kalpui a nih tur thu a sawi a. Vawiin a MZU zirlai te puala Ruihlo Hmansualna laka invenna chungchang inzirtirna chu a bultanna a ni tih a sawi a. Hun reilote chhungin Mizoram pum huap, hmun kilkhawr ber te thleng pawh thleng chhuak vekin SWD hnuaiah  MSD & RD kaltlangin sawrkar chuan ruahmanna a siam te a kalpui dawn a ni a ti.

Ministry of Social Justice &  Empowerment, Government of India in Magnitude of Substance Use in India 2019 tunthla khan a tlangzarh a. Hetah hian Mizoram dinhmun a tha lo hle a ni. Heng zirchiannaah hian rampum huap leh state pakhat chhung khaikhin zel a ni a; ruihlo chi hrang hrang leh a hmangtu tam zawng tarlan a ni. Ganja bikah Rampumhuap 1.2% a nih laiin Mizoram chu 3.2 % a ni a, a sang ber zinga mi a ni. Heroin, Opium leh Pharma opoid-ah rampum huap 0.70% a nih laiin Mizoram chu 6.90 % a ni a, a hluarna ber a ni.Nachhawkna ruichi - Sedatives-ah rampum huap 0.20 % niin Mizoram chu 1.26% niin a sangber 4-na a ni a; hnar hmanga hnim ruih chi ah rampum huap 1.17% Mizoram chu 4.695 niin a sang lamah 5-na a ni mek a ni. Zu in rampum huapin 27.3% a nih laiin Mizoram chu 15.1% niin a hniam zingah 10-na a ni thung.

One day Awareness Programme on Drug Abuse Prevention for University Students-ah hian a haw na hun bakah Technical Session  chu hun paliah thenhran a ni a. Hawnna hun hi

Prof. HK Laldinpuii Fente, Psychology Department chuan a kaihruaia. He hunah hian MZU Vice Chancellor Prof. k.R.S. Sambasiva Rao, SWD Director Laldikimi leh Dr Lalngurliana Sailo, Dean, Students' Welfare, MZU te hnen atang pawhin thusawi tawi ngaihthlak a ni.

Session I-naah Research Report: Baseline Survey on Extent and Pattern of Drug Use in Mizoram, Session II -ah Substance Abuse and Addiction Issues, Session -III-ah The Neuroscience of Addiction leh Session -IV-ah The Telltale Signs : How you May Help tih thupuiah te mithiam ten zirchhianna an chhiar chhuah chu ngaihtuahho a ni a. Vawiina MZU zirlaite puala zirhonna pawimawh tak buatsaihah hian MZU a Department 30 chuang atangin aiawh 2 theuh, zirtirtu pakhat theuh bakah pawnlam atangin mithiam engemaw zah an tel a ni.