Social Welfare Minister Dr K Beichhua chuan vawiin khan Kolasib Diakkawn YMA Hall-ah Mizo Zirlai Pawl, Headquarters Kolasib kum 40 tlin lawmna hun a hmanpui.

Dr Beichhua chuan hnam inpumkhatna atana MZP hnathawh ropui a tih thu a sawi a. Hna tha chhunzawm zel turin duhsakna a hlan a ni. Tawngkamah 'zirlaite chu nakina kan ram hruaitu tur in ni' an tih thin chu  awih awm vak thin lo mahse a takin a thleng dik zel a ni, a ti a. Nakina eizawnna tur te leh kawngzawh tur chu tun hunah thlanfel lawk a ngai a ni a ti. Zirlaite fuihna thu sawiin vawiina zirlaite naupang lehkha thiam tak tak leh quality nei tha tak tak ten ram an hruai hun hi nu leh paten kan nghakhlel hle a ni, a ti a. Zirlaite chu ram nghahfak an nih vanga an nun uluk tura chahin ruihhlo laka fihlim tlat tur leh a do kawngah theih tawp chhuah zel turin a sawm a ni.

Kolasib MZP Ruby Jubilee lawmna hun hi Pu Lallawmzuala MZP Kolasib HQ Treasurer in a kaihruai a, MZP HQ Kolasib Vice President Lalmawizuala'n inkhawm palaite lawmna thu a sawi a. Kolasib khawchhunga College leh Higher Secondary School te tan hnam lam intihsiak buatsaih nghal niin Ruby Jubilee lawmna hi naktukah chhunzawm leh a ni dawn a ni.