"Kan ram hian Education-ah harh tharna  kan mamawh tih Minister of State, School Education Department Pu Lalchhandama Ralte chuan khuallian ni a Mizo Students' Union General Assembly vawi 18-na Bairabi-a a hmanpuinaah nizan khan a sawi.  

School Education Department enkawltu Minister of State, Pu Lalchhandama Ralte chuan kan ram hian hmalam a pan zel theih nan khawtlang nu leh pate leh zirlaite kan zavaiin kan tan tlan a ngai a, zirna hian kan society-ah hmun sang ber a chan a ngai a ni a ti a. Zirna hmun ngaih pawimawh leh vawn zahawm kawngah te, zirtirtute inthlahdah leh thlahdah loh kawngah te pawh khawtlang nu leh pate hian tun ai hian ngaihven ila, chu chuan kan ramah Education revival a thlen thei dawn a ni a ti. 

Pu Lalchhandama Ralte chuan Mizote hian talent kan nei tha a, India ramah pawh skill nei tha pawl tak kan ni a ti a. Amaherawh chu kan skill hi engatinge sang takah kan vawrh theih loh tiin Mizo zirlaite chu puanven sawi chhing turin a sawm a ni. Minister chuan kan ram kan hnam a him zel theih nan kan thalaite hian kan thinlungah Mizo Nationalism hi a lailumah kan dah a pawimawh a. Keimahni theihna zawn theuhah hnamah kan chian a ngai a, naupang zirlaibuah pawh a theih chin chinah telh kan tum dawn a ni a ti.  

MSU General Conference-ah hian khualzahawm Pu Lalrinsanga Ralte MLA leh Vice Chairman Rubber & Allied Crop Development Board pawhin thu a sawi a. Pu Lalrinsanga chuan kan ramah hian All India service ah Mizo kan awm loh hun a thleng thuai dawn. Nationalism hi sawi sawi mah ila, sorkar ki pawimawhah hnamdang an awm fur chuan nationalism sawi sawi hian awmzia a nei lo thuai dawn. Chuvang chuan Mizo thalaiten zirnaah tan kan lak a ngai a ni a ti a. Hlawhtling turin thil pathum - tum ruhna, taimakna leh mahni inhneh zel theihna a pawimawh a ni a ti a. Kan ram thalaite min suat a min eichhetu zu kan khap a, ruihtheih thil tel lovin kan hlim thei ta. Ruihtheih thilte hi thalaite nun tichhetu a ni tih sawi darhtu ni theuh turin zirlai kal khawmte chu a sawm a ni. 

MSU General Conference hian nizan khan Zofa zirlaite run Bairabi-ah Zo zan an hmang a, hnam lam chi hrang hrang leh zaite an entir a, tunlai zaithiam lar thenkhatte an zai bawk a ni.