Vawiin khan YMA Run, Selingah Mizoram State Agriculture, Horticulture and Marketing Cooperative Federation(MAHFED) Ltd chuan Thingtlang kut hnathawk mite pualin Training/ Seminar on "Innovative & Pragmatic Ideas on Adaptable Development Approach" a buatsaih a. He hun hi Deputy Speaker Er Lalrinawma chuan Khuallian niin a hmanpui ani.

MAHFED Training hawngtu,  Er.Lalrinawma, Dy.Speaker chuan, Cooperative movement  chu ram changkang zawk te pawh an lo dinchhuahna  bulpui pawimawh tak a nih avangin India ramah pawh ngaih pawimawh a hlawh a. Mizoram mipui te pawhin tangkai taka chhawr kan tum leh kan chhawr thiam pawh a pawimawh hle a ni a ti."Cooperative Movement atana pawimawh hmasa chu mahni awmna leh chhevel ngaih pawimawh a; kan chhehvela hnathawhtur awm reng reng te - thawh hreh nei lovin, a neitu chan changa kan thawh bawrh bawrh a ngai a ni', a ti a. Cooperative Movement-ah MAHFED in mawhphurhna pawimawh tak an nei tih a sawi a. Kuthnathawktute kaihruai leh kuthnathawktute tharchhuah hralhchhuahna ngaihtuahpui kawngah te nasa zawka tan la turin MAHFED chuan tihtur a nei a ni a ti.

Vawiina MAHFED Ltd buatsaih training hawnna programme hi Pu Vanlalruata, Chairman, MAHFED Ltd chuan a kaihruaia. Khualzahawm  Pu VL Zaithanzama, MLA, President, Mizoram Cooperative Forum ni bawk hnen atangin ngaithlak a ni a. He hunah hian Seling leh a chhehvel khaw hrang hrang atang kuthnathawk tu leh Society member thahnem tak an kal khawm a, chawhnu lamah Mithiamten zirtur an buatsaih  zir ho na an nei nghal bawk a ni.