Mizoram infiammite leh State Level Sports Association hrang hrang hruaitu te puala Swine Flu awareness campaign chu vawiin (Ningani) chawhnu dar 2:00 khan Ramhlun Indoor stadium-ah neih a ni.

Mizoram State Sports Council chuan India ram chhung hmun hrang hrangah kum tluanin ram pum huap inelnaa tel tur infiammi a tirchhuak reng a, hetiang a nih avang hian India rama buaipui mek Swine Flu chungchanga awareness campaign neih a tula hriain infiammite leh an hruaitute tan a buatsaih ta a ni.

He awareness campaign hi Dr.Lalzarmawia Khiangte, Sports Medical Officer, MSSC-in a kaihruai a, Resource person Dr.Pachuau Lalmalsawma chuan Swine Flu chungchanga hriat tur tul hrang hrang leh invenna chungchang te a lem nena entirin inhrilhhriatna hun a hmang a, swine flu chungchang sawihona hun hman a ni bawk. Pu H.Thangchungnunga, SPO chuan lawmthu sawina hun hmangin infiammi leh sports Association hruaitu kalkhawm an thahnem hle a ni.