Vawiin March 12, 2015 hian Chhimveng YMA Hall, Mamit ah UD& PA Department-ina khawpui faina kawnga hmalakna kal zelah Urban Sanitation & Solid Waste Management tih thupui hmangin Workshop neih a ni a. Pu Vanlalngaihsaka, District Bawrhsap chuan khuallian niin he Workshop hi a hmanpui a ni.

Khuallian Pu Vanlalngaihsaka chuan khawpui faina ngaih pawimawh chhoh zel a tul thu sawiin, workshop a tel zawng zawngte thahnem ngai taka bawlhhlawh sawngbawl dan ngaithla a zir turin leh mite zirtir chhawng thei tur khawpin workshop hmang tangkai ila. Mamit District chhunga cheng ten faina kawngah tan kan lak chuan Mizorama District fai ber kan ni thei a ni tiin, mipui kalkhawmte chu District khawpui fai ber ni tura tan la turin a fuih a.

Workshop ah hian Pu P.L. Liandinga, Khatla ‘S’ in Mizote leh Faina-Hmanlai leh tunlai tih thupui hmangin zirtirna a pe a. Chawhnu lamah Er. R.L. Zidinga, DUDO, Lunglei in bawlhhlawh hman tangkai dan leh bawlhhlawh chu hausakna atana hman a nih theih a nih dan Power Point hmangin zirtirna a pe leh a. Pu Vanlalmawia, Joint Director (A) UD&PA Department in Clean India Mission tih thupui hmangin Mizoram faina chungchanga hmalakna hrang hrang, hmachhawp leh mipuite mawhphurhna leh mipuite tih ve tur chungchang te zirtirna a pe bawk a ni.

He Workshop hi Pu Zorammuana, Director, UD&PA Department in kaihruaiin Mizoram a District hrang hrangah hetiang programme hi hlawhtling taka hman a ni tawh a. Mamit District pawh hian an hlawkpui ngei a beisei thu a sawi a ni. Workshop ah hian Mamit a department hrang hrang, Tlawmngai pawl te, kohhran hrang hrang te an tel a ni.