1833/2023-2024

Vawiin khan Excise & Narcotics Department Conference Hall-ah Social Welfare & Tribal Affairs Minister Er. Lalrinawma hovin State Level Steering Committee for Celebration of Mim Kut an thukhawm a. Kuminah a hmasa ber atan 'MIM KUT 2023' hman thar leh dan tur leh a kaihhnawih thil pawimawhte an rel.

Mizo pi pute Kutpui pawimawh zinga pakhat, Mim Kut chu tun hnuah hman ni tawh lo mah se Mizo hnam nunphung leh ziaranga tel a nih avangin kuminah 'Mim Kut' chu hman thar leh ni se tia rel tawh angin 'Mim Kut 2023' chu tun thla September ni 29, 2023 (Zirtawpni) khian hman tum a ni.

'Mim Kut 2023' pual hian Logo Competition te, panel discussion te, chhungkaw tinten an hmangaih kal hmasate thlan siamthat/cheithat leh chawhlui kilhona hunte theih ang anga hman nise tih rel a ni a. Mim Kut denchhenin Riangvaite Thlanmual, Zemabawk ami chu tihfai leh cheithat nise tih rel a ni bawk. 'Mim Kut 2023' hmanna pui ber chu Vanapa Hall, Aizawlah nghah a ni dawn a, he huna tel ve turin Ministry of Tribal Affairs leh State hrang hranga Tribal Affairs Department aiawhte bakah Mizoram chhunga Zohnahthlak hrang hrang leh hnamdangte pawh sawm nise tih an rel.