1832/2023-2024

Aizawl 11th September, 2023: Vawiin khan Ngopa Community Hall sak thar chu Pu Lalruatkima, Rural Development, Land Revenue & Settlement, Information & Public Relations Department changtu Minister chuan khuallian niin a hawng a, SHG member te hman tur Ngopa VO (Village Organisation) pathum hnenah puanthui khawl a hlan. He hunah hian Dr. L Thangmawia, bialtu MLA (Lengteng a/c), Vice Chairman, Human Resources Development Board chu khualzahawm a ni.

Pu Lalruatkima chuan Lengteng leh Saichal Express tlanna thin, Mizo tlawmngaihna lo tilang thintute khua ngeiah khuallian ni-a hun a hmang thei chu lawmawm a tih thu sawiin rinawmna, dikna, huaisenna leh tlawmngaihna te zirlai naupangte-ah tuh a nih theih nan Human Resources Development Board leh Education Department hmalakna zarah zirlaite Syllabus thlakna kawnga Lengteng bialtu hmalakna chu lawmawm a tih thu a sawi a. Ngopa-in KTP khawmpui an thlen turah pawh faina leh thianghlimna kawngah theihtawpa tan la turin a sawm a. 

Minister chuan hmasawnna dawngsawng turin mipuite kan inbuatsaih a tul thu sawiin tun atanga kum 5 chhungin helai tlangdung te Aizawl-ah an lehlan hman dawn thu a sawi a. Ramin ri nei mahse hnamin ri a nei ve lo a, kan thenawm rama kan unaute'n kan ei chhung chu an ei ve ang tiin Rural Development hmalakna tehkhawng hrang hrangah Mizoram chu India ram pumah pahnihna kan ni a ti bawk.

Khualzahawm Bialtu MLA Pu L Thangmawia chuan a bial chhungah a vawikhatna atan Biomass Briquette Production Unit siam a nih theih nana Minister leh RD Department officials-te hmalakna leh inpekna lawmawm a tih thu sawiin BADP hnuaia hall tha tak Ngopa Chhimveng tan hawn a ni chu Ngopa mipui tan malsawmna a nih ngei a beisei thu a sawi a, a bial mipui aiawhin lawmthu a sawi. Ngopa chu notified town a puan a nih angin faina lamah pawh hmasawnna hmuh tur a awm chu lawmawm a ti a, faina hi changkanna a nih angin tan la sauh turin Ngopa mipuite a sawm. Covid hrileng karah pawh khaw dang thik khawpa hmasawnna, infiamna hmunhma leh kawng hrang hrangah khawtlang tana tangkai tak tak hmuh tur a awm chu lawmawm a tih thu sawiin Ngopa YMA leh mipui tan Silpaulin, Puanthui khawl leh parachute a hlan nghal bawk a ni.

Pu. H. Lalramliana, MCS, BDO Ngopa RD Block chuan technical report a pe a. Community hall sak thar hi BADP (Border Area Development Program) hun laia cheng 109.50 lakhs senga sak niin a dung sei zawng hi metre 23.50 niin a vang lam hi metre 14.80 a ni. Hall san zawng hi metre 6.50 niin Hall chhungah hian Gallery, Lamtual leh Stage bakah Committee room -cum-Library room te a awm a. Mipui 350 vel leng thei tura ruahman a ni. Community hall hnuaia hian parking lot siam ni bawkin motor te LMV 20 leh two wheeler 30 vel leng thei tur parking siam tel a ni. Community hall sak hna hi May 24, 2021 khan tan a ni a, BDO Ngopa Chairman-na hnuaiah committee din niin a sak hna hi uluk taka vil thin a ni a ti.

Vawiin vek hian Minister chuan Ngopa, Hmunnghak -ah khawl bunthar Micro Level Biomass Briquette Production Unit (MLBBPU) MGNREGS material Component cheng 30 lakhs senga sak chu a hawng nghal bawk a. MLBBPU hi bawlhhlawh hrang hrang sawngbawl a, leitha siamna tur niin meihawl thlakna environmental friendly, carbon dioxide pe chhuak tlem thei Biomass Pallet (meihawl chikhat) a siam thin dawn a ni.

Minister hian Ngopa BDO office complex a tlawh nghal bawk a ni.

Community hall hawnna programme hi Pu Malsawmtluanga, MCS, Jt Director, RD Department-in a kaihruai a, Pi Lalchhandami, CEO, MzSRLM pawhin a enkawl department hnuaia an hmalakna tlangpui a sawi a. Pu PC Lalramchuana, Vice President, VC, Ngopa-in lawmthu sawina hun a hmang a ni. Minister hi Aizawl atangin Officials te'n an tawiawm bakah Ngopa khawtlang hruaitute, tlawmngai pawl hrang hrang leh Self Help Group member-te programme-ah hian an tel a ni.