2046/2024-2025

Aizawl the 13th September, 2024 : Vawiin khan Social Welfare & Tribal Affairs Minister Pi Lalrinpuii hovin ama office chamber, MINECO-ah State Level Steering Committee for Celebration of Mim Kût an ṭhukhawm a; kumin 'MIM KÛT 2024' hman dan tur leh a kaihhnawih thil pawimawh dangte an rel.

Mizo pi pute Kutpui pawimawh zinga pakhat, Mim Kût chu nikum khan hman a ni tawh a, Mizoram mipuite ngaihhlut a hlawh hle avang leh Mizo hnam nunphung leh ziarang chhawm nun zel nan kuminah pawh a huamzau thei ang bera hman leh Committee chuan a rel a ni. 

Kumin 'Mim Kût 2024' chu tun thla September ni 30, 2024 (Thawhṭanni) khian Vanapa Hall, Aizawl-ah a hmanna pui ber chu nghah a ni dawn a. 'Mim Kût 2024' pual hian Essay Competition te, panel discussion te, chhungkaw tin ten an hmangaih kal hmasate thlan siamṭhat/cheiṭhat leh chawhlui kilhona hunte theih ang anga hman nise tih rel a ni a. Mim Kût denchhenin Riangvaite Thlanmual, Zemabawk ami chu tihfai leh cheithat nise tih rel a ni bawk.