3954/2023-2024

2024 Ramtuk thla ni 24: Mizoram Sawrkara Sports & Youth Services; Excise & Narcotics leh Labour, Employment, Skill Development & Entrepreneurship te changtu Minister Pu Lalnghinglova Hmar chuan vawiin khan Kolasib Press Club tlawhin, Mizoram Journalists' Association (MJA) Kolasib District member-te nen inkawm hona hun an buatsaih.

Minister hi Excise & Narcotics Department (END) Commissioner Pu Z. Lalhmangaiha, Private Secretary to Minister Pu H. Lalramenga leh Kolasib DIPRO Pu C. Lalhruaitluanga te'n ṭawiawmin, an President Pu Andrew Vanlalauva hovin District MJA member-te'n an lo dawngsawng a ni.

Kolasib Press Club-a inkawm hona hun buatsaihah Minister Pu Lalnghinglova Hmar chuan Minister dinhmun chu nihna ang chuan thil lawmawm tak ni mah se, mawhphurhna ang zawng chuan thil huphurhawm tak nia a hriat thu a sawi a. Hotute duhsaknaa ṭhalai kaihhnawih department pathum a chanah theih tawpa hma lak a tum thu sawiin, an hma lakna tur kawng hrang hrangah bengvar a, finchhuah ṭhin turin Kolasib District MJA member-te chu a sawm a. A department chan hnuaia hma lakna leh ruahmanna hrang hrangte tar langin, sports infrastructure siam belh aia a awm sa hmang ṭangkai a, infiam mite tihhmasawn tum a nih thu te; LESDE kal tlanga ṭhalaite tana hna tam zawk siam belh tura hma lakna tur ruahman a nih thu te; 'Bana kaih' policy chak taka bawhzui tum a nih thu te; END hnuaiah ruihhlo dona kawng leh ruihhlo ngaite chhanchhuahna kawnga nasa zawka hma lak tum a nih dan te a sawi a. Journalist-te chu mipui nena innghenga hna thawk, thil hrang hranga tawn hriat nei an nih angin theih tawpa thawhpui turin a sawm a ni.

He hun hi District MJA President Pu Andrew Vanlalauva chuan a kaihruai a. Pu Lalnghinglova Hmar chu MJA chhungkua aṭanga MLA-a tling leh Minister ni thei a ni chu an chhuang hle tih sawiin, District MJA hmingin lawmpuina thuziak an hlan a. District MJA Secretary Pu Pc. Lalṭhazuala chuan inhmelhriattirna hun hmangin, District MJA Vice President Pu C. Zomuanpuia chuan lawm thu sawiin hun a khar a ni.

Inkawm hona hun hman zawh hian Minister chuan Kolasib Press Club chhung chu fang kualin, a chhawng chunga Conference Hall thar tur buatsaih mek chu a en nghal bawk.