3953/2023-2024

2024 Ramtuk thla ni 24: Mizoram Sawrkara Excise & Narcotics Department (END) Minister Pu Lalnghinglova Hmar chuan vawiin khan Kolasib-a END Assistant Commissioner Office a tlawh.

Minister hi END Commissioner Pu Z. Lalhmangaiha leh Private Secretary to Minister Pu H. Lalramenga te'n ṭawiawmin, Kolasib END Assistant Commissioner Pu VL Muana Rokhum hovin thawktute'n an lo dawngsawng a. Recreation Hall-ah inkawm hona hun buatsaih niin, Minister hian Office hmunhma te fangin a en kual a. Thawktute nen Department leh Office dinhmun thlir hovin, hmasawnna tur hrang hrang an sawi ho a ni.

END Minister Pu Lalnghinglova Hmar chuan sawrkarin ruihhlo do leh ruihhlovin a tihbuaite chhanchhuahna lam a ngai pawimawh tih sawiin, hemi kawngah hian END chuan mawhphurhna lian tak an nei tih a sawi a. Thawktu indaih lohna tiziaawm tura sawrkar hma lakna kalpui mek a nih laiin, ruihhlo a hluar zel bawk si avangin indaih hun nghah hman a ni lo va, thawktu awm ang angte'n mahni inring tawk tak chunga ṭhahnem ngai taka thawh sauh sauh a pawimawh a ni tiin, thawktu leh hna thawhna hmanruaah a theih ang anga inthuam ṭhat tum a nih thu a sawi.

Minister chuan ruihhlo dona kawngah thawh ho ṭhat a pawimawh tih sawiin, thawktute chu thawh hona ṭha nei zel turin a chah a. Mizoram Excise & Narcotics Manual angin transfer leh posting kalpui a ni dawn tih sawiin, thawktute chu lo inring lawk turin a chah a; sawrkar hna thawk tan awm duhna bik emaw, awm duh lohna bik emaw neih a rem lo tiin, mahni awmna apiangah ṭhahnem ngai taka thawk turin thawktute chu a chah a. Zu leh ruihhlo hluar zel leh chumi avanga thi leh HIV vei pung zel tiziaawm turin a ṭha zawnga danglamna thlen a ngai tih sawiin, chumi kawnga ram siam ṭhat hna thawhnaah ṭang tlang turin thawktute chu a sawm a. Kolasib District Office tan thilpek pawisa fai ₹ 20,000/- a hlan nghal bawk.

He inkawm hona hun hi END Commissioner Pu Z. Lalhmangaiha'n kaihruaiin, END Minister-in ruihhlo dona lam leh department a vei chu thawktute'n an thlamuanpuiin, Minister kaihhruaina hnuaiah hmasawnna nasa tak hmuh an beisei tih a sawi a. Kolasib END Assistant Commissioner Pu VL Muana Rokhum chuan District Office dinhmun leh hma lakna report a pe bawk.

Assistant Commissioner of Excise & Narcotics, Kolasib District hnuaiah hian station pahnih - Kolasib Station leh Vairengte Station te a awm a. END Kolasib District hian kum 2023 chhung khan revenue-ah cheng nuai 32 chuang (₹ 32,81,885/-) an hmu a. Zu (country liquor) litre 2,898.300; zu bilh lai (fermented rice) ṭin 1,130; dawidim (yeast) kg 10; sap zu (IMFL) um (bottle) 21,158; beer um 120 leh canned beer 15,932 manin, damdawi lamah heroin kg 2.764; nitrazepam tablet 170 leh methamphetamine gram 734.78 an man a. NDPS Act hnuaiah case 19 ziak lutin, hemi kaihhnawihah hian mi 42 an man a; MLP Act hnuaiah case 3,264 ziak lutin, hemi kaihhnawihah hian mi 3,258 an man bawk.

Kumin 2024-ah February ni 22 thlengin cheng nuai 5 chuang (₹ 5,78,313/-) revenue hmu leh tawhin, zu leh damdawi eng emaw zat an man leh tawh a. NDPS Act hnuaiah case 3 ziak lutin, mi 3 an man a; MLP Act hnuaiah case 516 ziak lutin, mi 516 an man leh tawh bawk.