Indian National Trust for Art & Cultural Heritage (INTACH), UK & India tangkawpin Rabindranath Tagore pianchampha phak 150-na puala ‘The Power of The Pen - Tagore at 150’ tih thupui hmanga rampum zirlaite tana Painting & Essay Writing Competition a buatsaih lawmman pakhatna dawngtute hnenah nimin 19 July, 2012 chawhnu khan Art & Culture Minister Pu P.C. Zoram Sangliana-in lawmman a hlan.
INTACH, Mizoram Chapter Convener Pu P. Rohmingthanga, IAS(Rtd) kaihhruai lawmman hlanna inkhawmah Minister Pu P.C. Zoram Sangliana chuan lawmman dawngtute lawmpuina thu sawiin rampum huapa intihsiaknaah Mizo zirlaiten pakhatna an hauh theih chu an chhuanawm hle a ni, a ti a. Ram inpumkhatna leh hnam inunauna ngai pawimawh em em thintu Rabindranath Tagore puala intihsiakna, ramchhung mai ni lo ram pawn atang pawha zirlaite telna he intihsiakna chi hniha Mizo naupang ten lawmman an dawn chuan Mizote hming an tih that mai piah lamah India hnamte inunauna kawngah pawh thawh hlawk tak an ni, a ti. INTACH-in ramchhunga thil hlui leh hriat hlawh tawh mang lo thil tam tak zawnchhuah leh vawnhim hna an thawh mek chu ropui a tih thu a sawi bawk.
Tagore lemziah intihsiaknaa pakhatna National Winner Grace Chawngsangpuii Ralte, d/o Dr. John M. Ralte, Govt. Chaltlang HSS hnenah lawmman trophy leh INTACH atangin lawmpuina tangkafai Rs.5,000/- hlan a ni a. Tagore Essay ziah intihsiakna Regional Winner Lucy Lalthakimi, d/o J. Lalramhluna, Helen Lowry HSS hnenah lawmman trophy leh Rs.3,000/- hlan a ni.
Lawmman hlanna inkhawmah hian Industries Minister Pu S. Hiato pawh telin Mizo zirlai leh thalaiten thiamna tam tak an nei a, kaihhruaina tha an dawn leh kawng hawn sak an nih phawt chuan a ti tha berte zingah an tel zel a, Mizo hnam timawitu an ni thin a ni, a ti bawk.
Lawmman hlanna inkhawmah hian MADC Chairman Pu Hiphei; MLA-te Pu P.P.Thawlla, Col.Z.S.Zuala, Pu R. Selthuama; INTACH Co-Convener Pu C. Chawngkunga; INTACH Secretary Pu Thanseia leh Mizoram sorkara Special Secretary Pu R.Vanlalvena te pawh an tel a ni.
