October Ni 17 atanga ni 19 chhunga neih, Lunglei District Level PYKKA Sports Competition, chu Nimin ni 19 (Zirtawpni) chawhnu dar 3:00 khan Lunglei Art & Culture Auditorium-ah Pu S. Laldingliana, Parliamentary Secretary, Sports & Youth Services chuan a khar.

He kharna inkhawm hi Pu K.Lalrinpuia, Secretary, District Level PYKKA Committee leh Secretary LDSC ni bawkin a kaihruai a. Pu J.Vansangzuala, DSYO leh Secretary District Level PYKKA Committee ni bawkin Report a pe in Vote of Thanks a sawi bawk. Competition neihna tur atan hian Mizoram State Sports Council hnen atang Rs. 200000/- a hmuh a ni.

He hunah hian Khuallian Pu S.Laldingliana, Parliamentary Secretary chuan District Youth Officer leh Staff te thawhrimna te, LDSC thawktute inpekna ah te lawmthu a sawi a. Infiammite fuihna thu sawiin, sawrkar chunga infiam mite an lawm dan te, Sports Infrastructure a hmathar lak a nih avanga NE games hial kan thleng thei ta leh, National Games pawh thleng thei tura tan lak a nih dan te, kum 2016 a Olympic awm turah pawh infiammi thawn chhuak ve thei tura tanlak a nih dan te tarlangin Pu Dinga chuan, "Tihtakzetna nena infiamna huang chhung hi kan luhchilh a nih ngat chuan eizawnna tling a ni tawh a ni. Chuvangin, taima lehzualin ke pen ila, kan taksa ti chhe thei ruihhlo lakah fihlim i tum tlat ang u," tiin Infiammi te a fuih a, Infiammite lawmman chu a sem nghal bawk a ni.

He PYKKA District Level Sports Competition-ah hian RD Block 4, Lunglei, Hnahthial, Lungsen leh Bunghmun RD Block atangin infiammi engemawzat an thawkchhuak a. He competition-ah hian Lunglei RD Block te pakhatna niin Hnahthial RD Block-te pahnihna an ni a, Lungsen leh Bunghmun ten an dawt a ni.

State Level PYKKA hi Group thum-ah then a ni a. Chung Group hrang hrangte chuan October leh Nov. thla chhung hian Aizawl-ah Competition an nei leh dawn a. Chumi atana inpuahchahna pawh tunah hian Lunglei District PYKKA te hian chak takin an kalpui mek a ni.