Mizoram Upa Pawl, Taitesena Area Conference Vawi -3 na chu vawiin khan Tuidam Community Hall-ah neih a ni a, Pi Lalbiaksangi, District Bawrhap Mamit chuan khuallian niin a hmanpui a, Pu Lalhuapzauva Vice President General Hqrs chuan khualzahawm niin he hun hi a hmanpui bawk

He hun hmanpuitu Pi Lalbiaksangi chuan kum upa zawk kan pi leh puten a hetiang hun tha an buatsaih hmanpui theia a awm chu lawmawm a tih zia sawiin Upa zawkte zah, chawimawi leh duat hi thangthar te tih tur niin Mizote pawh heti lamah hian kan thangharh mek zel a ni a ti. Upa kalkhawmte chu an ngaihtuahna te chawlh tir mai lova sawrkar kalphung leh fello lai awm ni a, an hriatte pawh tawnhriat leh hun tam tak paltlang tawhtu an nih avangin finchhuah thin turin a sawm a. Hemi kawngah hian amah ngei pawh fin chhuaha hrilhhre thin turin MUP Conference hmangtu palai te chu a sawm a ni.

Vawiin Taitesena Area MUP Conference hi chawhma leh chawhnu hunah then niin chawhma hun hi Pu Sangliandawla, Vice President Taitesena Area MUP in a kaihruaia, Chawhnu hunah hian Pu F. Thangkhuma President, Taitesena Area MUP in kaihruaiin Thaidawr, Darlak, Kawrtethawveng leh Tuidam atangin MUP Member thahnem takin an hmang a ni.

Taitesena Area MUP huam chhungah hian Unit 8(pariat) a awm a, Unit 4(pali) atanga report atangin, member mipa 218 leh hmeichhia 238 an vaiin mi 456 an awm a ni. kum 2015 January - 2016 February chhunga an member boral mi 30 sunna an nei bawk.