Vawiin chawhnu khan Mizoram State Legal Services Authority bultumin Zemabawk North YMA Hall-ah Legal Aid Clinic neih a ni a, Deputy Speaker Pu R. Lalrinawma, bialtu MLA ni bawk chuan khuallian niin a hawng.

Pu R.Lalrinawma chuan tunhma in Legal Aid Clinic te chu institution ah hawn thin a ni a, tuna Mizoram State Legal Services Authority ten khawtlang mipuite chhawr tura clinic a hawng thei chu lawmawm a tih thu a sawi a. Dan hriat hi kan zavaia kan him leh hlim tlanna tur a ni a, kan hriatloh avangin kan chanvo kan changlo thei a ni, a ti. Court-ah chuan dan hriatloh hi chhuanlam tling a ni lo tih hria a Mizo mipuite chu taima zawka dan hriat lehzual tum turin Deputy Speaker chuan a chah a. Tumah dan chunga leng kan awm lova, dan hnuaiah ang khat vekin mitin te hi kan awm a ni tiin ram changkang apiangah khua leh tui te chuan dan an zawm tha a, hma an sawn bik a ni, a ti bawk.

Khualzahawm AMC Ward No.VII Counselor Pi K. Lalhmingliani chuan dan hriat chu huaisenna a ni a, dikna chu ngawihbopui ngawt a remlo, a ti a. Ram dan hriat hi mipui mimir mawhphurhna a ni ang bawkin dikna vawnhim tlat hi kan mawhphurhna a ni tel tih hre turin khalkhawmte a chah a ni.

Clinic hawnna inkhawm hi Local Council Chairman Pu Zohruaia’n a kaihruai a, Vice-Chairman Pu Lalthanpuia Khawlhring leh Advocate Pu Lalchhanhima Khiangte ten thu an sawi.

Dan lama harsatna neite tan Legal Aid Clinic ah hian Zirtawpni leh Inrinni chawhnu dar hnih apiangin JAC Office-ah a rawn theih an ni ang.