Vawiin khan Champhai DC leh District SAGY Nodal officer ni bawk Pu Vanlalngaihsaka hovin Champhai District chhunga Model Village paruk a hmalakna te thlirhona leh hmabak la awm te sawihona hun DC Conference Hall-ah neih a ni.

DC chuan Sorkarin a phut angin MLA ten an bial chhung theuhva Model Village an thlanah te Sorkar laipui scheme kalpui nei Department te chuan ngaihpawimawh zel tur a nih thu a sawi a. Charge Officer te hmalakna chu fakawm a tih thu a sawi bawk.

Vawiin meeting ah hian khaw tin a Charge Officer theuh ten an hmalakna report an nei a. MLA ten target an siam bakah SAGY Committee in hmasawnna tur kawng a thlan belh ah te chuan a tlangpuiin an thawk tha hle a. School lut rual zawng zawng luh tir vek ah te, naupangah leh ran zawng zawng hri danna pek vek leh piang/mitthi leh innei zat register vek kawngah te hian 100% target chu khaw tin hian an tlin deuh vek tawh hlawm a. Ruantlang leh Biate chu Open Defecation Free (ODF), inthiarna neilo awmlohna khuaah an inpuang tawh a.Vawiin meeting hian Mobile Health Clinic neih dan tur a rel bawk.

Champhai District-ah hian Model Village atan Lengteng Constituency-ah MLA Pu H. Rohluna chuan Kawlbem thlangin, Tuichang bial MLA Pu Lalrinliana Sailo chuan Chawngtlai a thlang a; Champhai North bialtu MLA Pu TT Zothansanga chuan Rabung thlangin, Champhai South bialtu MLA Pu JH Rothuama chuan Ruantlang a thlang a. East Tuipui bialtu MLA Pu T. Sangkunga'n Khuangthing a thlan bakah, Aizawl khawchhung bialtu ten an bial chhungah Model Village an thlan a remloh avangin Aizawl South-I bialtu MLA Pu R. Vanlalvena chuan Biate a thlang bawk a ni.