Taitesena Memorial Academy Building thar chu nimin khan Pu John Rotluangliana Deputy Speaker chuan a hawng. Hawnna inkhawm Building thar a neih Pu P.C Lalthianghlima DPC, SSA Mision; Mamit District kaihhruaiah thusawiin khuallian Pu John Rotluangliana, Deputy Speaker chuan District Hqrs mipuite khawdang te tana entawn tlaka an khawsak thin avanga lawmthu hrilhin thawhhona tha tak hnuaiah Mamit khua-in kawng tinrengah hma a sawn a ni a ti a.

Taitesena Memorial Academy Building ropui tak mai Rs 32,23,871 senga sak a ni thei hi thil ropui tak a ni a ti a, hetiang ang Building hi District dangah a awmlo a ni tiin thawktute hnenah lawmthu a hrilh bawk a ni. Khuallian chuan Mamit khawpui Department hrang hrang hotute fakin District hmaswnna atana thawhhona tha an neih avangin lawmthu a hrilh bawk. Hetih rual hian hmasawnna kal chho zelah Department engemawzat lo la awm tura a hmun hma zawnna kawnga harsatna a awm loh nan khawtlang mipuite inhawng turin a chah bawk. Khuallian chuan he Academy atanga National leh International level thlenga infiammi an chherchhuahna ah lawmthu a sawi bawk a ni. Pu Rodney L. Ralte, IAS, District Bawrhsap Mamit chu khualzahawm niin thu a sawi bawk a ni.

He Academy ah hian naupang 30(Cl-VI-VIII) awm theihna tura ruahman niin nitin zirna leh football zirna kalpui a ni a. Taitesena Memorial Academy(TMA)atang hian Mizoram aiawhin National level ah mi 16 tirhchhuah tawh niin International level-ah mi 4 an fehchhuak tawh a. Lalkroshlua, S/o Zirsngzela Kawrtethawveng hian ni 16-25 May 2009 a Asia Football Confederation U-13 Teheran, Iran-a neihah India aiawhin a fehchhuak a; Lalduatsanga S/o V. Sangkunga Mamit chuan IMG Reliance Company Sponsored na hnuaiah Florida, USA ah zirna a neih hnuin ni 1-10 August, 2011 a South Asian Football Federation Cup, Kathmandu, Nepal-ah India ai a awh bawk a, tunah hian Goa ah U-16 Coaching Camp-ah awmin U-16 Asia Qualifying zawnna, China-a awm turah India ai a awh leh dawn a ni. Lalmuanzova S/o Lalsangzuala leh Lalthasanga S/o LT Rila Kanhmun khua ve ve te hian ni10-13 May 2011 chhunga U-13 Boys Festival, Yazaed City, Iran-a neih ah India aiawhin Lalmuanzova hi India Team Captain niin Best Player ah thlan a ni nghe nghe a ni. Khuallian hian Academy naupangte hnenah hian Cycle 30 a hlan bakah Chaw ei thleng 30, Football leh Volley Ball a pe bawk. He TMA Building thar hi ni 17 Febebruary 2011 a sak tan niin RCC with CGI Roof a ni a, a zau zawng chu 3272 sq. ft. niin a chhawng a ni bawk. Choka Assam Type 560 sq. ft. a keng tel bawk a ni. A vaia senral Rs. 32,23,871/- a ni a, thawktu chi hrang hrang 15 an awm mek a ni.