Champhai the 18th March, 2015: Kiwi leh grape chin dan enfiaha Mizorama cham mek Taiwan mithiamte chuan vawiin khan Champhai chhehvela grape chinna leh Champhai winery an tlawhin, Champhai Grape Growers' Society-te nen inkawmna hun an hmang.

Tukin zing khan Taiwan mithiam lokalte hian Keifangtlang bula grape huan tlawhin grape chinna kawnga loneitute hmalakna hrang hrangte an enfiah a. Taiwan mithiamte chuan grape leh kiwi chingtuten hna an thawk nasa tih a hmuh theih thu sawiin, hetihlai hian hlawk zawka thlai an chin theihna tur chuan tui lamah harsatna an tawk a, an thlai chin danah pawh hmasawnna tur a awm bakah thlai chawmna tur leitha an duhkhawp an hmu thei lo chu an harsatna langsar zual nia an hriat thu an sawi a. Sik leh sa chungchangah Champhai chhehvel chuan thlasik tuar na mah se kiwi leh grape chinna hi hlawk zawka kalpui tur chuan theihna tha tak a neih an rin thu an sawi bawk.

Vawiin chhun khan Tlangsama Winery tlawh lehin Taiwan mithiamte hi Champhai Grape Growers' Society ten an lo dawngsawng a. Anmahni pual hian inkhawm tawi buatsaihin he hun hi Pu HKL Thanga, Vice Chairman, CGGS chuan a kaihhruai a. Taiwan palai pathumte hian thusawiin Mizoram chu nuam an tih thu leh, loneitute thlai thar a hlawk theihna turin hun lokal zel turah Mizoram leh Taiwan sorkar chuan thawhhona tha tak an neih chhoh zel an beisei thu an sawi a. Pu CC Lalchuangkima, Project Director, DRDA pawhin thu a sawi ve bawk.

Champhai Grape Growers Society ten chaw chhun an kilpui hnuah Taiwan mithiamte hian Aizawl pan turin Champhai an chhuahsan a ni.