Vawiin khan Mamit Chhim veng Hall-ah 'National drinking water & Sanitation awareness week' hman niin, Mamit DC Pu Vanlalngaihsaka chu khuallian niin he week hi a hawng.

Pu Vanlalngaihsaka chuan tuihna humhalh chu mitinte ti makmawh a ni tih sawiin, kan zavai mawhphurhna a ni a ti a. Faina chungchangah kum 2008 atang khan Mamit district chhunga khaw hrang hrang ten khaw fai lawmman an lo dawn thin tawh thu tarlangin, hmasawn zel tura tan lak a pawimawh thu a sawi. Khuallian chuan fai leh hriselna hi a inkungkaih tlat a, hemi kawngah hian sorkar laipui pawhin hmalakna thar a rawn siam thin a heng hmalakna hlawhtlinna hi kan kutah theuh a awm a ni a ti bawk.

He week hawnna hi Pu Lalropuia, EE PHE mamit in kaihruaiin, an hmalakna te a tarlangin, tui renchem leh tuihna humhalh pawimawh na te leh thianghlimna lam hawi inzirtirna a nei a. ' Need of soil and water conservation', 'environment & sanitation' leh 'linkage of water and forest' tih thupui hmangin Pu Z.Lalthanzuala, RO Soil & Water Conservation Department, Pu Zochungnunga Asst. Professor Mamit College leh Pu C Lalbiaka, DFO Mamit ten zirtirna an pe a ni. Week hawnna inkhawm neih zawhah hian khawlai thenfai hna neih nghal a ni.