No.1133/2020-2021               

Lawngtlai, Tomir thla ni 16, 2020: Mizoram sawrkar ruahmanna anga Tamil Nadu atanga Lawngtlai District mi leh sa lo haw mi 46 te chuan vawiin khan tluang takin Lawngtlai an lo thleng a. Sawrkarin inkaihhruaina a siam anga fimkhur taka lo dawnsawn niin, Lawngtlaia sawrkar enkawl inkhung hranna (quarantine facility) medical quarters block A & block B-ah tha taka khung hran nghal an ni.

Tamil Nadu atanga Lawngtlai District mi leh sa lo hawte hian rela Bairabi an lo thlen hnuah bus 3 hmangin police ven himna hnuaiah Lawngtlai an rawn pan a. Lawngtlai an lo thlen hian an chanchin kimchang lo chhinchhiah a, rapid antibody test (RAT) kit hmanga an hriselna dinhmun lo enfiah zel niin, chumi hnuah quarantine facility-ah dah luh nghal zel an ni a. RAT hmanga enfiahnaah hian rinhlelhawm an awm lo.

Hetih lai hian vawiin thleng khan haw runpui thawh khatnaa hmarchhak state atanga lo haw Lawngtlai District mi leh sa 183 khung hran zinga mi 87 chu anmahni khung hran hun bi a kim tawh avang leh RAT hmanga test nawn lehnaah anmahniah harsatna sawi tur a awm loh avangin quarantine facility atanga chhuahtir an ni tawh a. An chhuah hnuah pawh mahni in lamah ni 14 chhung la inkhung hran chhunzawm tur leh fimkhur taka an hriselna dinhmun thlithlai reng tura chah nghal an ni.

Heti hian tuna Lawngtlai District chhunga sawrkar enkawl quarantine facility-a khung hran mek hi a lo awm sa mi 96 bakah, vawiina lut thar mi 46 nen, an vaiin mi 142 an ni.