No.1134/2020-2021

Dated Champhai, the 16th May, 2020: Champhai district mi leh sa Covid-19 hripui leng mek avanga Tamil Nadu State a tangkhang rawn hawte chuan vawiin chawhma dar 11:40 vel khan Champhai an rawn thleng a, anmahni lo dawnsawnna hmun tura ruat Vanlallawma Indoor Stadium (VANIS), Kahrawt-ah Bawrhsap Pu Mark Lalthanliana, SP Pu Rex Zarzoliana, Official dang, Medical Team leh Kahrawt VLTF te chuan Bus 5 hmanga rawn haw Champhai District mi leh sa 69 te hi an lo dawngsawng a ni.   

Tangkhang rawn hawte hi VANIS an rawn thlen veleh Kahrawt VLTF Volunteer te’n PPE a inthuamin kut an silfai tir zel hnuah chawlhna room siamah chawlh hahdam tira ei leh inte pek an ni a. Hemi hnu hian Bus tina chuangte chu a tahtawl zelin Medical Screening leh Rapid Test (RAT) te tihsak an ni a, an zavai hian Rapid Test an negative vek a, tumah damlo leh medical treatment la lai an awm lo a ni. Tul dangte buaipui anih hnuah awm khawmuang lovin sawrkar dana Ni 14 chhung inkhunghrang turin an zinga mi 66 (Mipa 29 leh Hmeichhia 37)  te chu Polytechnic Building, Tlangsam Quarantine Centre panpuia dahluh an ni a, midang 3 (Mipa 2 leh Hmeichhia 1) te chu remchan zawkna avangin DPRC Quarantine Centre Keifangtlangah dahluh an ni bawk. Medical Screening leh Rapid Test-te neih zawh anih hnu hian chetvelna hmunhmate chu Health department Staff te’n 0.5 % Sodium Hypochloride hmangin an thian thianghlim leh vek a ni. 

Vawiina rawn haw thleng mi 69 zinga 38 te hi hmeichhia niin, a dang 31 te chu mipa an ni a.  Tun dinhmunah Champhai district-ah sawrkar ruat Quarantine Centre ah mi 76 an awm mek a, heng zinga mi 10 (Mipa 6, Hmeichhia 4) te hi DPRC Quarantine Centre, Keifangtlangah awmin, a dang 66 te chu Tlangsam Polytechnic Building Quarantine Centre-ah an awm a ni.   

Attachment

  • Loading attachment...