N0.1135/2020-2021

“Tun hun hi fimkhur ngaih hun lai ber a ni a, zan hnihkhat thil thuah fimkhur loh avanga chhiatna vawrtawp thleng thei reng kan ni”

Zoram mipui zawng zawngte chibai ka buk che u a, Lock down period thawhthumna chu Pathian hruainain kan hmang zo dawn ta a. Sawrkar pawhin uluk takin hmanraw chi hrang hrang nen hma lain, State/District/Local Taskforce te, Kohhran leh mimal angten theihtawpin hma kan la theuh a, chumi rah duhawm tak chu Pathian pawhin mal min sawm sakin, ram pawn atanga  lo lut ( imported case) pakhat ZMC-a enkawl chu a lo damchhuak ta a. Hei hi Kohhran leh mimal tinte tawngtaina Pathian min chhanna a ni. Tunah tak hi chuan kan hriat theih chinah Covid-19 hri vei MIzoramah kan awm ta rih lo. India ram hmun hrang hang atang pawhin Mizoram sawrkar leh Task  Force hrang hrangte kan inpekna leh thawhhonaah pawh fak kan hlawh ve hle a ni.

Hetih mek lai hian, India leh Mizoram sawrkar pawhin tun hnaia lockdown kan kenkawh chungchangah loh theih loh a ei leh bar lakluh kawngahte a pawilo chinah inthlahdul deuhin thil kan kalpui mek a. Tunah hian kan ram mi leh sate ngei state hrang hrangah hun rei tak tangkhangin an mangang mek a. An ei leh in leh awmna tur thlengin sawrkarin ngaihtuahin tan a la mek a. State dangte pawhin an mi leh sa seng luh runpui an kalpui ve mek bawk a ni. Kan sawrkar pawhin Chief Minister zahawm tak Pu Zoramthanga kaihhruaina hnuaiah theihtawp chhuahin kan unau tangkhangte lakluh hna ngawrh takin a kalpui mek a. A lo haw turte hi an zat chiah pawh hriat harsa khawpin mi sing chuang dawn tling tura ngaih an ni. 

A tir lama lockdown kan kalpui chhung zawng leh ram pawn atanga lo lut an awm loh lai kha chuan kan him tlang vek a. Tunah erawh state dang atanga an lo luhna Gate pui hawnsakin, tam tak an rawn haw takah chuan, hri kai tamna hmun thui tak paltlanga rawn haw mekte an nih avang hian, kawng lakah kai palh thil pawh awm thei a ni a. Chuvangin, kawng tinrengah  a hma aia nasa taka kan fimkhur tlan zual fe a ngai a, anmahni ngei pawh an invawn fel a ngai tak zet bawk a ni. Sawrkarin dan leh hrai zawm tur a siamte uluk taka kan zawm tlan vek loh chuan zan hnih khat thilah fimkhur loh avanga chhiatna vawrtawp thleng thei reng kan ni tih I hre reng  ang u. 

A huhova Quarantine-te leh loh theih loh avanga mahni in lama Quarantine-te pawh khunghran an nih mek lai hian sawrkar thu chhuakte zawm hram hram turin ka chah duh a. An duhthusam anga tha leh nuama kan enkawl vek theih loh pawhin, “Ram tana ka tih ve theih a ni’  ti chunga lungdam taka an lo pawm thiam ka duhin ka ngen tak meuh a ni. An lo chhuah hunah pawh thil thleng palh thei a la awm a ni tih hre chunga thiantha leh chhungkhat lainate intlawhpawh  kawngah fimkhur turin ka ngen bawk a ni.

A nawlpui tam zawk an lo luh fel hnu pawhin chawlhkar hnih dawn chhung chu kan fimkhur zual a la ngai dawn a, chumi hunah chuan kan ram dinhmun a la hriat theih chauh ang. Chumi hnu zelah pawh Covid-19-in kan ram dinhmun a tihdanglam dan tur chin a la hriat loh. Chuvangin, thuneitute  hma lakna kan zawm zel a pawimawh a, chutianga kan awm phawt chuan Pathian pawhin mal min sawm ngei ang. 

Tuna Mizoram sawrkar leh Private Hospital-te pawh hian  Covid-19 dam lo tam zawk enkawl hi chu kan hmanraw neih hrang hrangte thlir hian kan la zuam lo khawp a. ZMC-ah pawh ICU khum 7 kan la nei a ni mai a, damlo pakhat  ringawt enkawl pawh a buaithlakin,  Doctor leh thawktu dangte enkawlna senso pawh a hautak hle a ni. Covid-19 damlo hi doctor zawng zawngte enkawl theih a nih loh avangin, a enkawltu bik an awm a ngai a, a damdawi tak hi khawvel mithiamten an la hmuchhuak bawk si lo a,  enkawl a buaithlakin a hautak hle a ni. 

Thuawih tak leh fimkhur taka kan tanrual zela, thuneitute thu kan zawm that zel chuan, Pathian pawhin mal min sawmin, Covid-19 hripui hi kan la hneh ngei ang tih hi i ring tlat ang u.