No.1110/2020-2020

Dated Champhai, the 15th May, 2020: Covid-19 hripui leng mek avanga Tamil Nadu State atanga mahni chenna pana haw mek Mizoram mi leh sa te chuan vawiin chawhma lam khan Rel in Bairabi Station an lo thleng a. An zingah hian Champhai District a cheng mi 69 te pawh an rawn tel a ni. Bus 5 a chuangin Champhai panin chawhnu dar 3:50 vel khan an lo chhuak a, ruahman dan chuan naktuk zing hian Champhai lo thleng hman tura beisei an ni. Vanllallawma Indoor Stadium (VANIS) Kahrawt-ah Official leh Medical duty ten lo dawngsawngin Medical Screening, Rapid Test (RAT) leh tul angte buaipui hnuah Polytechnic Building, Tlangsam Quarantine Centre a khunghran tura dahluh zel tur an ni ang.

Lo hawte dawnsawn dan tur leh a tul angte buaipui dan tur chungchanga inhrilhriatna chu vawiin chawhnu khan Bawrhsap Pu Mark Lalthanliana hovin VANIS ah neih a ni a. Bawrhsap chuan Mizoram pawna tangkhangte lakluh runpui neih meka lo thleng hmasa ber turte felfai taka lo buaipui anih theihna tura inhrilhhriatna leh a taka lo inzirlawkna neih angaih thu sawiin, Official, Staff leh Kahrawt VLTF te nena inrawnkhawmna neih chuan mikhual lo dawnsawn kawngah awlsamna a siam a beisei thu a sawi a. Duty turte theihtawp chhuah theuh turin a chah a ni.

He hunah hian Pu Lalnunfela Chawngthu, SDO Sadar in hriat tur tul leh lo hawte buaipui kawnga ruahmanna siamte a sawifiah a. Hemi hnu hian chetlak dan turte enfiaha tihchhin a ni.

Report dawn tlai berah chuan lo haw mekte hi an vaiin mi 69 an ni a, Bairabi-a Rapid Test (RAT) neihah an negative vek a ni. Thalai vek niin, an zingah hian kum 60 chunglam emaw, medical treatment nei lai an awmlo a ni. An vai hian Polytechnic Building, Tlangsam Quarantine Centre ah dahluh vek tur an ni ang.

Tun dinhmuna Champhai district-a Quarantine Centre-a awm mi 9 te chu DPRC Quarantine Centre, Keifangtlangah an awm vek a ni.