Vawiin khan Task Force on Commodities member-te chu an Chairman Pu HL Rochungnunga, Food Civil Supplies and Consumer Affairs (FCS&CA) Commissioner & Secretary hovin a pisaah an thukhawm. He Task Force hi COVID-19 vanga mipui nitin mamawh (essential commodity)-te chheprelh, a man pangngai aia toa hralh leh hralh ruk te a awm loh nana hma la tura din a ni.

COVID-19 hri leng vangin thuthang tam tak awm karah ei tur tlakchham hlaua mipui an mangan loh nan Task Force hian tan a la dawn a. Supply Department leh Legal Metrology chuan bazarah leh dawr hrang hrangah man pangngai aia sanga bungrua lei leh hralh a awm lohna turin hma an la mek, Nodal Officer pahnih ruat a ni. DCSO ‘E’ leh DCSO ‘W’ kaltlangin market hi vil reng niin heng nodal officer te hnenah hian report an thehlut reng bawk a ni.

Local Council leh Village Council te kaihhruainain Mizoram hmun hrang hrangah Local/Village Level Task Force on Covid-19 din a ni tawh a. Vawiin meeting-ah hian dan bawhchhiaa dawr bungrua man to taka hralh thin te, uchuak taka bungraw lei khawl te leh bungraw chheprelh te a awm loh nan Aizawl veng tinah leh khaw hrang hrangah he task force hian hma a la mek a. Tu ten emaw a chuangliama an neih laiin thenkhat kan tam chhuah thei reng tih hriaa mipui leh dawrkai zawng zawngte hnenah hetiang tih ching lo tura ngenna siam turin Task Force on Commodities chuan hma a la dawn bawk a ni.

Tun dinhmunah Mizoramah Supply phur motor-te chu pangngai takin a thleng reng a, essential commodities pawh mamawh tawk ang neih reng a nih thu meeting-ah hian sawilan a ni a. Chutihrual chuan mipui mamawh zualpui eirawngbawlna gas, petrol, diesel leh buhfai phur motor ten rang zawka checkgate an paltlang theihna turin hmalak ni se an ti bawk.