Mizoram mipui duhtakte,
Vawiin hian khawvelin Coronavirus avangin harsatna liantham tak a tawk mek a. Hlauhthawn tur leh chi-aina tur a nih loh laiin inthlahdah erawh chu a thiang hauh lo thung. He kan hun harsa tawng mekah hian Mizoram mipuite hnena ka chah duh chu nizan lama kan Prime Minister zahawm tak ngenna kha tih hlawhtlin ni se tih hi a ni.
Kan hriat tawh angin Prime Minister chuan tun Pathianni lo awm turah zinglam dar 7 atanga zan dar 9 inkarah mipui te pawna chhuak lo turin min ngen a nih kha. Hemi hun chhung bikah hian khua leh tui te zawng zawng te chu an in lum chhuahsan lo tur leh khawlai leh kawthlerah te chhuak miah lo turin kan in ngen a ni. Tun hi kan zavaia tanruala hun leh kan hmaa chona lian tak, thukhat vuaa kan hmachhawn hun a ni a. Kohhran, Tlawmngai pawlte leh Pathiantihtute theihtawpa he hrileng laka kan himna tura hmalatu zawng hnenah lawmthu ka sawi rualin an hnathawh pawimawh tak hi chhunzawm zel turin ka chah a. Mizoram mipui tana rawngbawlna hi Pathian rawng kan bawlna a ni tih i hre thar leh ang u.
Tichuan, Pathianni, March 22 a lo thlen hunah kan zaa kan inchhungah theuh inkhung tur leh Prime Minister min ngenna ti hlawhtling turin kan in chah nawn leh a. Tin, hemi ni vekah hian tlailam dar 5 a lo rik veleh khua leh tui zawng zawngte chuan kan tana an nunna thapa hnathawktute - Damdawi Ina thawk zawng zawng te leh Mizoram bikah chuan Kohhranmite leh Tlawmngai pawlte zahna lantirin kan tukverhahte dakchhuakin emaw kan thuthmun theuhah te thleng pawhin ri thei te khawng ri a, kutbeng dur dur turin kan in sawm nghal bawk e. Prime Ministerin a lo sawi tawh angin he Janata Curfew hi kan hmaa chonna hmachhawn turin mipui ten tumruhna, insumtheihna leh dawhtheihna kan nei tih lantirna a ni dawn a ni.
A tawpna atana ka sawi duh chu he chonna hmachhawn tur hian Central leh State sawrkar an inpuahchah tha tawk tih hi a ni a. Ei leh bar bakah nitina mipui mamawhte pawh kan kham khawp a awm reng dawn a. Heng thil pawimawh bik chawkluh hi a chatlak dawn lo ani. Khua leh tui zawng zawngte chu tha taka Central leh State Sawrkar thlawp tlat tur leh he hrileng danchah a nih theihna tura hmalakna reng reng chu zawm tlat turin kan in chah a. Mizoram hi hmun himber ni reng se, a chhunga cheng mipuite pawhin hriselna tha nei zel se tih hi ka tawngtaina a ni e.
Jai Hind
