1542/2023-2024

Dated Serchhip, the 17th August, 2023: Vawiin khan Serchhip District Task Force on Immunization leh District level Anaemia Mukt Bharat Steering Committee meeting neih a ni a, Deputy Commissioner Pu David Lalthantluanga hovin DC meeting hall-ah member-te an thukhawm.

India sawrkar chuan natna hri leng inkaichhawn theih laka him nan naupang zawng zawngin a hun taka vaccine an lak hi a ngai pawimawh hle a. Tun hnaiah measles leh rubella natna te India ram atanga umbo a tum avangin ngawrh lehzuala hmalak mek a ni a. Ram pumah vaccine hi round thumah thenin a la thei tur chin nu naupai atanga naupang zawng zawng ten hmaih hauh loa a hun bi a vaccine an lak theih nan ruahmanna siam a ni. Serchhip District chhungah hian round khatna neih zawh tawh a ni a, August ni 7 atanga ni 12 chhungin round khatna hi neih a ni. Round hnihna hi September ni 11 atanga ni 16 chhungin neih tura ruahman a ni a, round thumna chu October ni 9 atanga 14 ah neih a ni ang.

Measles leh rubella natna umbo tum a nih avang hian Immunization Special drive kalpui a ni a. Kum dangah chuan naupang kum 2 hnuai lam target an nih laiin kumin atang erawh chuan naupang kum 5 chin hnuai lam zawng target an ni ta thung. Nu naupai te hnenah hian Td vaccine pek an ni bawk. Naupang leh nu naupai, a la tur chin zawng zawngin vaccine an la kim em tih endik turin survey neih thin a ni a, healthworker te leh ASHA te bakah Anganwadi a thawktute pawhin he survey ah hian an pui thin a. Vaccine lak hmabak engzat nge awm tih leh an lakloh chhan te zirchiangin vaccine an dawn ngei theih nan remchang an siamsak thin a ni.

Deputy CMO Dr Lallawmkimi Chhakchhuak chuan first round neih zawh taka an thil tawn te sawiin sakhaw thil avanga vaccine la duh lo awm thin te zingah pawh vawi tam tak an kalchilh hnua la duh an awm tih a report a. Kumin atanga online reporting an kalpui tan thu leh vaccine an pek apiangin report hi hmun leh hmunah internet kaltlanga an ziah luh nghal zel thu ngaihthlak a ni.

Anaemia Mutk Bharat Steering Committee thutkhawm neih zui nghal a ni a. National Anaemia Control Programme hnuaiah kalpuiin thisen tlakchhamna (Anemia) laka Mizoram mipuite kan fihlimna tura beihpui thlak mek a ni. Sawrkar laipui chuan kum 2018 September thla khan an lo kalpui tan tawh a, Mizoramah erawh hemi atana damdawi sem tur Iron-Folic Acid chu Mizoramin kan mamawh zat kan hmuh lawk theih loh avangin March ni 30, 2021 khan kalpui tan a ni. Nausen thla ruk atanga thla 59 te chu hlawm khata thenin hlawm dangah kum 5 atanga kum 9, a pathumnaah kum 10-19, a palinaah hmeichhia kum 20- 24, a panganaah nu naupai leh nu nausen pawmte hnenah Iron-Folic Acid hi sem thin a ni.

Vawiin meeting-ah hian he damdawi semchhuahna kawnga hma an lak dan leh harsatna an tawh te ngaihthlak a ni a. School naupang zingah iron folic acid semchhuah zat report chu a hun takah dawn kim a nih thin loh avanga harsatna an tawh chu tunlai thiamna internet hmang tangkai a, awlsam zawk leh kimchang zawnga report thehluh dan tur ruahmanna meeting-ah hian an siam a ni.