No.3884/2021-2022

Aizawl, 2nd February, 2022 : Vawiin khan Task Group on Monitoring of CAB & COVID-19 Restrictions chu an Chairman, Pu Vanlalngaihsaka, Secretary, DM&R kaihhruaina hnuaiah a vawi khatna tan an thukhawm a. Task Group hian COVID-19 Guidelines te, COVID SOP, COVID Appropriate Behaviour (CAB) leh COVID No Tolerance Week/Drive te chu Mizoram District hrang hrangah zawm that a nih leh nih lohte, dan bawhchhiate man leh pawisa chawi tir an nih dante nitin an khaikhawm dawn a ni.

Vawiin meeting-ah hian Task Group Chairman Pu Vanlalngaihsaka chuan mahni tana tha tih hre reng chung pawha sorkarin COVID dona tura dan leh hmalakna hrang hrang a duante zawm tha duh chuang lo an la tam em em a, chuvangin mipuite mahni inven leh an fimkhur zual dan tur inzirtir leh inhrilhriatna kawngah thlahdah lova tan lak zel a pawimawh a ni a ti a. Hemi kawngah hian district tina DDMA-te bakah NGO, Task Force leh Media te thawhpui zel a, hman tangkai zel tum a nih thu a sawi. Vawiin meeting-a thurel angin Mizoram State chhunga district zawng zawngte kar khat chhunga COVID-19 inkaihhruaina an zawm that leh thatloh dan chu media-ah puanzar zel tum a ni bawk.