No.1243/2020-2020

Vawiin khan Task Group on Quarantine Facilities ten an Chairman Pi Esther Lalruatkimi IRS, Commissioner & Secretary School Education Department hovin state pawn atanga lo haw te inkhunghranna hmun hrang hrang an tlawhkual.

Task Group on Quarantine Facilities te hian tun hnaiah state pawn atanga lo haw tur mi sing chuang zet an awm avangin inkhunghran nan sorkar hmunhma ringawtin a daih dawn lo tih hriain Kohhran hrang hrangte chu an hall leh hmunhmate hman an dil a, Kohhran thahnem takin an dilna chu ngaipawimawhin an hmunhmate hman an phalsak chu Pi Esther Lalruatkimi hian lawmawm an tih thu sawiin heng hmunhma thenkhatte hi vawiinah an tlawh kual a. An dinhmun te thlirin harsatna an neihte an enpui hlawm a ni. Hmun hrang hrang an tlawh kualte hian harsatna an neihte a hmuna an ngaihthlaksak avang hian an lawmthu leh thlamuanthlak an tih thu an lo sawi hlawm a ni.

Task Group on Quarantine Facilities te hian Synod Camping Centre Sihphir Neihbawih te, IGFAI te, Ramhlun Presbyterian Kohhran Hall te, Khatla leh Mission Veng Presbyterian Kohhran Hall te an tlawh a. Heng hmun hrang hrang an tlawhnaah hian Pi Esther Lalruatkimi chuan Khawpui hrang hrang atanga lo haw tur an la tam avangin chungte hre reng chung chuan LLTF ten ruahmanna siam zel a pawimawh thu te, DC office remruatna piah lamah mahni veng theuhte a him thei tur ang bera lo inruahman fel a pawimawh thu te a hrilh a. Zin haw te zingah fimkhur tawk lote leh inkhunghran pawimawhna hre tawk lote awm palh theih anih avangin dawhthei taka inenkawl a tul thu pawh a sawi bawk a ni.