No.1242/2020-2020

Mamit 20th May, 2020: Er. H. Lalzirliana, Vice Chairman, Road and Infrastructure Development Board, Mamit Bialtu MLA ni bawk hovin Road and Infrastructure Board members- te chuan vawiin khan NH 44A kawngsial hna thawh mek an tlawh.

Vice Chairman, Road and Infrastructure Development Board chuan NH 44A kawngsial hnathawh mekah hna harsa lai leh lunghmun lai Dampui khawhnuai laih tlang a ni ta chu lawmawm a tih thu a sawi a. Helai kawng hi laih tlang a nih tawh chuan Motor eng chi hmang pawha zawh theih turin chak takin metal hna thawh chhoh tum a ni a. Kawng peihfel a nih hunah chuan Mamit District chhunga chengte tan Aizawl pawh reilote-ah thlen zung zung theih a nih tawh dawn thu a sawi.

Mamit Bialtu MLA chuan hmasawnna atana pawimawh ber Mamit District chhung inkalpawhna kawng tha tak nei tura hmalak mek a ni chu a lawmawm hle a, kumtluana kawng mam tha kan neih reng theihna turin duat taka enkawl zui chu mitinte mawhphurhna a nih thu a sawi. Hna enkawltu leh viltute pawh kawng tha leh tlo kan neih theih nan uluk lehzuala hnathawh mekte vil turin a chah bawk a ni.

Vice Chairman, Road and Infrastructure Development Board hian Daplui Bridge, Teirei Bridge, Darlak leh NH 44A atanga Dampui khaw panna kawng sial thar mek chu a tlawh bawk a. NH 44A Mamit khawpui luhna pengthuam cheibawl dan tur UD&PA hotute a hmunah a sawipui nghal bawk.

Road and Infrastructure Development Board Members te hi PWD hotute chuan lo dawngsawngin NH 44A kaltlanga lei (Bridges) siam mek hna kal dan report-a an tarlan danin, Dialdawk 30 metre a sei 100% chu hna zawh tawh a ni a. Daplui lei hi 50% zawh tawh niin, Teirei Lei hi 60.68% zawh tawh a ni bawk a. Langkaih Lei hi 13% thawh zawh tawh a ni bawk.

Vawiin Road and Infrastructure Development Board Members te hian NH 44A leh Dampui Diversion kawngsial mekah hnathawhte tha thawkhat viaua hriat a ni a, chutihrual chuan duhkhawp loh lai awmte a rang lama siamtha turin PWD hotute hi an ngen nghal bawk a ni.

Vice Chairman, Road and Infrastructure Development Board hi Board Members atangin Pu K. Vanlalvena, Pu Saihnuna Sailo, Pu P.L Sawmliana te chuan tawiawmin UD&PA hotute, Aizawl leh Mamit atanga PWD hotute bakah khawtlang hruaitute'n an tawiawm a ni.