No.1241/2020-2020

Dated Champhai, the 20th May, 2020: Ni hnih kalta atanga Champhai South bialchhung Veng, Khua leh ramri hrula duty post hrang hrangte tlawhkuala thang mek Champhai South bialtu MLA Pu TJ Lalnuntluanga, Minister of State for Law, Transport & Forest department chuan vawiin khan a bial chhung fang chhunzawm zelin Dilkawn, Kelkang, Mualkawi, Melbuk leh Zokhawthar te tlawhin HSLC examination result tihchhuah taka hlawhtlinna changte hnenah lawmpuina a hlan a ni. Hemi hnu hian Covid-19 hrileng darh zel tur venga ramri Tiau lui hrula rammu mekte pawh tlawhin an mamawh Thosilen a pe a, Zokhawthar Village Level Task Force kutah Buhfai quintal 12.5 leh Thosilen engemawzat a hlan bawk.

Pu TJ Lalnuntluanga chuan a bial chhunga lehkhathiam an pun belh zel chu lawmawm tiin, intin tlawhchhuaka chibai buk thin chu kumin bikah erawh Covid-19 hripui vanga a remchan loh avangin sawrkarin inkaihhruaina a siamte zawm chung zela lawmpuina hun buatsaih a lo ngai ta zawk a ni, a ti a. Beidawnna hi Setana thlawhhma anih thu leh duh ang diak diaka kal theih loh hun a la awm dawn thu sawiin, hun harsa paltlang ngaih hunah rilru fim leh ngaihtuahna zau zawk seng thiam turin Zirlaite a fuih a. Beidawng lova tumruhna nena chona hmachhawn fo thin angaih thu sawiin, Zirlaite chu mahni veng, khua leh ram tan enge ka tih ang a, engtinnge ka tangkai ve theih ang tih inzawt fo thin turin a chah a. Lehkhathiamna chu nu leh pa, midangte zahthiamna leh harsatna hriat thiam theihna anih avangin midangte tana malsawmna nih tum turin a chah a ni.

Minister chuan Zirlaite chu rilru inkiltawihna leh midang aia hniam bika inngaihna nei lova, ka ti thei a ni tih thupui vawnga nunpui tlat tura fuihin, mahni kutke a dinga chhungkua, khawtlang leh ram tana chhenfakawm nih tum turin a chah a. Hlawhtlinna changte chu thinlung taka a lawmpui thu sawiin, thilpek hlu leh lian tham pe lo mahse thinlung leh tihtakzeta lawmpui entirna ani tih hriatpui zawk turin a ngen a. Lehkhathiam chu chhung leh khat huikhawma tanpui theitu nihna ani tih hre renga, rintlak leh belhtlak nih tuma lehkha zir turin a fuih a. Zirlaite chu hlawhtlinna changa hna tha tak thawk tura duhsakna hlanin, dinhmun tha zawk an thlen hunah pawh midangte tana malsawmna nih tum thin turin a fuih bawk a ni.

Pu TJ Lalnuntluanga chuan vawiin hian Zirlai hlawhtlinna changte; Dilkawnah 6, Kelkangah 4, Mualkawiah 11, Melbukah 8 leh Zokhawtharah 29 te hnenah pass lawmpuina thilpek Dictionary bu a hlan a ni.

Vawiin vek khan Minister Pu TJ Lalnuntluanga hian Covid-19 hripui leng mek laka kan him theihna tura ramri a rammu mek Zokhawthar Lei chhak leh thlanga duty post hrang hranga Champhai khawpui chhung Branch YMA duty-te leh Zokhawthar VLTF te chu YMA hruaitute nen an tlawh a. Law Minister chuan mahni inlum chhuahsana ramri veng tute hnathawh chu fakawm tiin, ram leh hnam himna tura thawktute chungah Sawrkar aiawhin lawmthu a sawi a ni.

Law & Judicial Minister Pu TJ Lalnuntluanga hi Dr. Lallawmkima, DIPRO Champhai, Pu Thanliana Hauhnar ACF Champhai, Pu Robert Lalhmuakliana, OC Zokhawthar Police Station, Central YMA Gen Secretary Prof. Lalnuntluanga, Sub-Hqtrs YMA (SYMA) Champhai President Pu VL Chama Hnamte leh hruaitu dangte bakah khawtlang hruaitu te'n an tawiawm a ni.