Vawiin chawhnu dar 4.00 khan Mizoram-a Tata-Hitachi company dealer thar hawn tak lawmna puala inkhawm Tourists Lodge, Chaltlanga neih chu Parliamentary Secretary Pu Lal Thanzara chuan a hmanpui.
Pu Lal Thanzara chuan thu sawiin, “Hmasawnna ruhrel din kawnga Mizoram kawng zawh mek chuan a tawng sang tawh hle tih chu sawifiah ngai hran lovin khawvela company lian berte zinga mi, TATA-HITACHI meuhvin Mizoram-a dealer puitling an rawn din hian a lantir a ni” a ti a. Tunhmaa Border Roads Organisation (BRO) chauhin an neih thin lei laihna hmanrua leh khawl changkang tak tak Mizoram contractor-ten keimahni puala kan nei ve thei ta hian changkanna lam kan pan zel a ni tih a lantir bawk a ni, a ti. Tata-Hitachi dealer tharte chu Mizoram hmasawnna atana an thiamna leh hmanraw tha ber berte rawn chawlut tur leh anmahni dawrtute tana belhfakawm turin Pu Lal Thanzara chuan a fuih bawk a ni.
He dealer thar hi NE Equipment Solutions Pvt. Ltd hnuaia din a ni a; Zemabawk North-ah an inbun a , a neitu chu Gaurav Pal a ni. Tata-Hitachi hi khawvel pum huapa company lar pahnih Tata (India) leh Hitachi (Japan) intiamruala din a ni a. Mizoram-a an bungrua hmangtute mamawh leh a chhe siamna kawngah hetianga dealer puitling an rawn inhawn tak avang hian nasa takin thil a samkhai ngei a beisei thu Gaurav Pal chuan a sawi.
