Nimin khan Keifang leh Seling khuaah te Tawi Cluster chhunga NLUP tanpuina semna hun hman a ni a. He hun hi Home Minister Pu. R.Lalzirliana, Tawi Constituency bialtu MLA ni bawk chuan a hmanpui.

Line Department pakhat, Commerce & Industries Department hnuaia NLUP beneficiary-te hnena tanpuina sum a hlanna ah Home Minister Pu R. Lalzirliana chuan NLUP chu Mizoram Sawrkar thupui : 'rorelna dik' tihhlawhtlinna, dinhmun harsaa khawsa mek mirethei leh chanhai te chhanchhuah hna tihpuitlinna a nih thu a sawi a. Rorelna dik chu miretheite ngaihsak leh chhanchhuah a ni a ti a. NLUP kaltlangin sawkarin rorelna dik a thlen tir mek a ti. Home Minister chuan sawrkarin a tih theih chin ti mahse, NLUP hlawhtlinna atana pawimawhber zawk erawh chu tanpuina dawngtute inpekna a nih thu a sawi a. NLUP a sawkar inpekna thukzia Zoram mipui ten an hria tih sawiin tanpuina dawngtute chu thahnem ngai taka an hmalakna chhunzawm turin a chah a. NLUP hmalakna hnuaia an zau panna kawng te pawh a lo hnawk deuh a nih pawhin sawrkar beisei nghal mai lova hnatlanga thenfai theih te chu thenfai thin nise a lawmawm hle ang a ti a. A thlawna pawisa sem dawngah inngailova tihtak meuhva an hmalak duhna te sawrkarin a hriatpui avanga tanpuina hmu an ni tih leh an hnathawh bultan nana sawrkar puihna dawng an ni zawk tih inhrenawn leh turin NLUP dawngtute chu a chah a ni.

Tawi Cluster chhunga NLUP tanpuina semna hun hi Keifang Community Hall-ah Pu H. Thangmawia, General Manager, DIC Aizawl in kaihruaiin Seling BNRESK building-ah Pu CT Rosiama, Deputy Director, DIC Aizawl in a kaihruai a. NLUP tanpuina semchhuah hi Keifang-ah khaw 8-a beneficiary 69 hnenah leh Seling-ah khaw 3-a beneficiary 72 hnenah hlan a ni.