Kumin November ni 28 a hman tan tur Early Childhood Care and Education (ECCE) Curriculum chungchangah ni thum chhung Bilkhawthlir ICDS Project hnuaia Anganwadi worker-te training neih pui a ni a, nimin khan VC North Conference hall-ah kharna hun hman a ni a.
He hun hi Pu R.Laldinliana CDPO Bilkhawthlir chuan hmanpuiin, training chhuakte hnenah completion certificate a sem nghal bawk.
CDPO chuan ECCE Day chu thla tin nilaini vawi 2 naah hman thin tur a nih thu sawiin, he hunah hian khawtlang nu leh pa, zirtirtute leh department danga thawkte pawh a thei apiang hmanpui tura sawm thin turin worker te a chah a. ECCE Day hian naupang kum 6 hnuailam te zirna atan nu leh pa ten an theih ang ang an rawn thawhchhuahpui theihna tura chochhuah chu a tum a ni tiin, he kalphung thar hi kan awmna hmun theuha nu leh pa te pawh hrethiam thei tura zirtirna pek chu worker te mawhphurhna a ni a ti bawk.
Training hi Pu Pc.Lalrinmawia CO Bilkhawthlir/ District Master Trainer leh Pi Challiannguri CO Bilkhawthlir/District Master trainer-in an neihpui a, nimin khan thupui thlan bik hmang a zirlai kalpui dan turte a takin an tihpui a ni. Training an neih zawh hian worker-te hnenah Activity book bakah Anganwadi material an mamawh thenkhatte sem nghal a ni.
Tun tuma training te hi Batch No-I a ni a, hei hian Anganwadi centre 37 huamin Worker 37 an awm a ni. Batch No-II-in Bairabi-ah chuan tun thla vek ni 25-27 chhung hian training hi kalpui leh a ni dawn a, Bairabi circle chhungah hian Worker 23 leh Centre 23 an awm mek bawk.
