AH&Vety, DM&R, etc. changtu Minister Pu C. Ngunlianchunga chuan tunlai khawvel changkang chho zel umpha turin Sap tawng thiam a pawimawh a, tawng thiam tawk loh avangin mahni nih tur ang ni zo ta lo an awm phah thin, a ti. He thu hi vawiin Aizawl Press Club-a General English Volume-2, ‘Zotawnga English Zirna’ bu Pu Melvyn Vanlalhlimpuia ziah a tlangzarhnaah a sawi a ni.

Minister chuan hlawhtling tura thawhrim pawimawhzia sawi zawmin, thawk mang lova neih tumna rilru pu kan tam ta lutuk hian ringtu kan nihna pawh a tichhia a ni, a ti a. Mitin kan thiam zawng leh kan thawh theih inanglo mah ila, rinawmna leh taimakna nen kan thawh chuan mi tangkai, mi hlawhtliang kan ni theuh thei a ni, a ti a. Zotawnga English Zirna bu ziaktu Pu Melvyn Vanlalhlimpuia pawh hun leh ngaihtuahna nasa tak seng a lehkhabu a puitlin chu lawmawm a tih thu sawiin, zirlai leh mi tam takin tangkaia an chhawr ngei a beisei thu a sawi a ni.

Vawiin General English tlangzarhna ah hian a ziaktu Pu Melvyn Vanlalhlimpuia chuan a buatsaih dan chanchin tlangpui report a pe a. Hun hi Pu Raymond Lalbiakzama'n a kaihruai a ni.