Vawiin khan Lawngtlai District Sports Committee buatsaih Lawngtlaia state leh LADC sawrkar hnuaia department hrang hrangte intihhlimna, 1st Inter-Departmental Sports Meet chu LADC Hall-ah Lawngtlai DC Dr A. Muthamma IAS chuan a hawng.

DC chuan infiamna hmanga Lawngtlai District-a sawrkar hna thawkte intihhlimna hmasa ber buatsaih a ni chu thil chhinchhiah tlak tak a nih thu a sawi a. Lawngtlai District-in danglam bikna a neih chu state leh district council hnuaia inrelbawlna hran a awm chu a ni tiin, chuta thawkte chu district hmasawn nan lungrual taka thawh ho a tul a ni, a ti a. Infiamna hmanga thawh hona tha zawk siam a ni tur chu lawmawm a tih thu a sawi bawk.

Khual zahawm, Lawngtlai District MJA Vice President Pu Lalngheta Ralte chuan sawrkar hna thawkte'n hawi thawvenna hun pawh nei hman lovin rim takin ram hmasawn nan an thawk thin a. Chutih laia an intih thawven ve theihna tur infiamna hmanga intihhlimna buatsaih a ni chu remhriatthlak leh lawmawm a tih thu a sawi.

He Sports Meet hawnna hi LDSC Asst Secretary Pu Matthews R.Laldinpuia chuan a kaihruai a. Sports Meeet buatsaih a nih dan te ngaihthlak niin, infiamnaa tel turte'n thutiam an sawi rual a. Zaithiam zai ngaihthlak a ni bawk.

1st Inter-Departmental Sports Meet, Lawngtlai 2016 hi October ni 27, 2016 thleng neih a ni dawn a. Infiamna chi hrang panga - badminton, carrom, chess, chinese checkers leh table tennis hmanga inel tur niin, department 29 tel in, heng zing a 11 chu Lai Autonomous District Council hnuai a mi an ni.