Lawngtlai District Agriculture Office chuan vawiin atang khan an hnuaia NLUP tanpuina dawng tur an thlante hnenah pawisa fai an sem chhuak tan.

Agriculture Department hnuaia 3rd leh 4th Phase NLUP tanpuina hi Lawngtlai East Constituency Cluster-ah sem hmasak niin, October ni 29 khian sem zawh hman tum a ni a; tukin khan NLUP tanpuina sem tur Department mi leh sate chuan Lawngtlai an chhuahsan. NLUP tanpuina sem pah hian 1st Phase atanga 4th Phase thlenga tanpuina dawngtute hma lak dan zir chianna (Beneficiaries Impact Analysis) an nei nghal dawn a ni. Lawngtlai West Cluster-ah chuan November ni 2 atanga 6 inkarah sem chhuah leh a ni ang.

Tun tuma Ariculture Department-in NLUP tanpuina an sem chhuah mek hi WRC-I & II leh Oil Palm chingtu chhungkaw pakhat tan Rs. 20000/- (singhnih) leh Sugarcane-ah Rs. 16000/- (singkhat sangruk) zel a ni a. Tanpuina an sem chhuah tur hi a vaiin cheng nuai 234, sing 7 leh sang 6 niin, chhungkaw 1176 hnenah sem tur a ni.