97/2024-2025
Mizoram Sorkar hnuaia Taxation Department chuan kum 2023-24 chhungin chhiah Rs. VBC 1112.58 a la lut a. Department-in revenue a hmuhna hrang hrangte chu GST te, Mizoram VAT te leh Profession Tax te an ni a. Heng zingah hian GST atangin revenue lut a sang ber a, Mizoram VAT hnuaiah hian GST hnuaia lut ve lo petroleum products hrang hrang atangin chhiah lak a ni bawk a. Tin, Profession Tax hi dan ang taka eizawnna neite hnen atangin an sum lak luh atanga lak thin a ni.
Mizoram sorkar-in kum 2023-24 chhunga Taxation Department revenue lakkhawm tura a bituk chu B.E. ah Rs. VBC 1000.00 a ni a. Hei hi R.E. ah Rs. 1098.50 a tihsan a ni. Taxation Department hian an (R.E.) target hi Rs. VBC 14.08 a khumin, Rs. VBC 1112.58 an la lut a ni. A hnuaiah hian chhiah (tax revenue) luh dan chipchiar zawkin tar lan a ni:
GST - Rs. VBC 970.25
VAT - Rs. VBC 125.93
Prof. Tax - Rs. VBC 16.37
Heng bakah hian GST hman anih hmaa Entertainment Tax atanga chhiah ba lo lut Rs. 30,000 leh Firms & Societies registration fee Rs. 2,19,370.00 te a tel bawk a ni.
Kum tinin Taxation Department revenue collection hi a pung chho zel a. Kum 5 chhunga a pun chhoh dan han tarlang ila:
2019-2020 - Rs. VBC 667.28
2020-2021 - Rs. VBC 677.83
2021-2022 - Rs. VBC 894.75
2022-2023 - Rs. VBC 1020.66
2023-2024 - Rs. VBC 1112.58
Kum 2023 – 2024 chhunga an thawhchhuah a punna hi za zelah 9 (9%) a ni. Mizoram chhunga GST lo luhna lian tham tak pakhat chu Sorkar hnuaia Works Contract hnate hi anni a. Tun hnaiah SASCI leh PMGSY hnuaia Works Contract thawhna bill contractor-te hnenah pek chhuah a tlem avangin GST revenue collection hi engemawchen a nghawng a. Mahse hei hi chu contactor-ten bill an lak huna rawn pung chho leh mai tur a ni a. A thla bi a kum kal ta te nena khai khin khian thla thenkhatah chuan kum kalta phak loh changte hi a awm ve fo thin a, hei hi India ram State dangte dinhmun pawh a ni a. GST tax revenue hi bungrua hralh leh service hralhna atanga lo lut anih miau avangin sumdawng ten an inhralh that leh that loh vah te, contractor ten bill an lak leh lak lovah te a innghat thuk em em a ni.
