Vawiin chawhnu khan Taxation Minister Pu JH Rothuama'n Commissioner of Taxes office a tlawh a, office building fangkualin an hnathawh dan te a enpui.
Minister hian Commissioner of Taxes office-a thawktute meeting a neih pui nghal a. Commissioner of Taxes Pu Lalthangliana Varte chuan lawmna thu sawiin Taxation department dinhmun te, hnathawh tlangpui leh hmachhawp te a lo hriattir a, Minister hi Taxation department a Zonal office te a remchan huna tlawh turin a sawm nghal a. Taxation department chuan North East state te zingah Mizoram hi model state ah siam a tum a, Mizoram chhungah pawh Taxation department chu model department ni turin tan lak a ni a ti bawk.

Taxation Minister Pu JH Rothuama chuan Taxation department-a thawktute thawhrimna fakin hna an thawh nasatzia mi hrang hrang sawi a lo hriat te chu lawmawm a tih thu a sawi a. Taxation Department chu sorkarin hma a sawn theih nana thawka sum leh pai hai luttu a ni tiin department hmachhawp hrang hrang te ti hlawhtling turin theihtawpa hma lak a tum thu a sawi a ni.

Taxation department hi kum 2006 atang khan department malin a awm ve chauh nain hma a sawn chak hle a. Value Added Tax (VAT) te, POL Tax (petroleum products leh lubricants) te, Professional Tax te, Entertainment tax leh Central Sales Tax (CST) te lakkhawm hna a thawk a, kum 2009-2010 chhunga tax (chhiah) lakkhawm zawng zawng pawh Rs. 8,845.44 lakhs lai a ni tawh a ni.

Taxation department hmalaknain Entry Tax khawn thei tura hmalak mek a ni a. Asian Development Bank tanpuinain department tih len tum a ni bawk. VAT leh CST atan computerization hna chak tak a thawh mek a nih bakah Goods & Service Tax (GST) India ram puma hman a nih ruala hmang ve thei tur pawhin thawktute leh hmanrua te ti changtlunga hma lak mek a ni.