No.1967/2020-2020

Vawiin khan Taxation, Home, Disaster Management & Rehabilitation Minister Pu Lalchamliana’n 40th Goods and Services Tax (GST) Council Meeting a hmanpui a. COVID-19 hrileng avanga zin veivah a remchan loh avangin GST Council Meeting hi Video Conference hmangin neih a ni.

Ni khat awh, GST Council Meeting-ah hian COVID-19 hrileng in India rama chhiah (GST) dinhmun a nghawng dan zir ho a ni a. Lockdown avanga India ram pumpuiah sumdawnna hrang hrang mumal taka kalpui theih anih loh avangin thla tina tax pek hunbi leh late fee chungchang pawh hriatthiamna zau tak nen a bik taka ruahmanna siam a ni. Hemi avang hian April leh May 2020 thla chhung khan chhiah (GST) tlingkhawm pawh a thlahniam lo thei lo va. Tun dinhmunah chuan Sorkar kum kal lai 2020-21 chhunga chhiah (GST) beisei dan tur hriatthiam har deuh rih mah se, lockdown te hlih a nih a, sumdawnna mumal taka kalpui chhoh anih theih hunah tax revenue hian ziaawm lam a pan chhoh zel beisei a ni.

He Meeting ah hian GST Council Meeting Vawi 39-na in a lo rel tawh anga GST Act hnuaia Notification, Order leh Circular hrang hrang tihchhuahte nemngheh a ni a. Central Sorkar leh State hrang hrang Sorkar-ten GST Act kalpuina kawnga siamthat ngai a awm leh awm loh te thlir hovin, a tul anga hmalak dan turte rel a ni.

Minister hi Pu Vanlal Chhuanga, Commissioner & Secretary, Taxation, Pu Kailiana Ralte, Commissioner of State Tax leh Taxation Officer dangten an tawiawm a ni.

GST Council hi The Constitution (101st Amendment) Act, 2016 hnuaia Article 279A tlawhchhana din a ni a. He Constitutional Body-ah hian Union Finance Minister chairman-na hnuaiah State hrang hrang Finance Minister emaw Taxation Minister emaw te chu member an ni. GST Council hian Central leh State inkarah leh, State leh State inkarah palai hna thawkin, rualkhai taka hnathawh ho dan tur ngaihtuah thin a ni.