No.1966/2020-2020

Aizawl, the 12th June 2020: Vawiin khan Dr. Jitendra Singh, Union Minister of State, DARPG leh DONER-in hovin e-Office changtlung zawka kalpui dan tur sawi hovin N.E. States ten Video Conferencing hun hman a ni a.

He meeting-ah hian North East State hrang hranga Chief Minister-te leh IT Minister-te an tel a. Mizoram State aiawhin Hon’ble Minister for ICT, Pu Robert Romawia Royte a tel a ni.

ICT Minister Pu Robert Romawia Royte pawhin e-Office implement turin Central Sorkar atanga instruction mumal tak N.E state tana siam tul a tih thu te, Internet connectivity-a harsatna sutkian chungchangah Central lam atanga tanlak tul a tih thu te a sawi lang bawk.

State hrang hrang Chief Minister-te Pu Prem Khandu Thungan (Arunachal Pradesh), Pu Conrad Sangma (Meghalaya), Pu Prem Singh Tamang (Sikkim), Pu Neiphiu Rio (Nagaland) leh IT Minister ten an ngaihdan te an sawi hnuah hetiang hian thutlukna siam a ni. Project Steering Committee din a ni ang anga, he committee-ah hian e-Office implementation atana mi pawimawh hrang hrang te an tel ang. Kum 2022-ah chuan sorkar office hrang hrang, Secretariat, Directorate leh District office-ah e-Office hmang vek tawh tura hmalak tum a ni.

He meeting hi Dr K. Shivaji, Secretary, DARPG-in a kaihruai a, e-Office tangkaina hrang hrang te sawi a ni. Tunlai Covid-19 avanga khawvel dinhmun ngaihtuah phei chuan paperless leh contactless-a hna thawh theih a pawimawh hle a. Tin, official-te pawhin office-ah kher lo pawh an awmna hmun atang zela file-te awlsam taka an lo en theihna tur a nih avangin hna pawh a kal chak phah beisei a ni. Vawiina Video Conferencing hmanga inrawnkhawmnaah hian ICT Minister hi DP&AR(Good Governance Cell) leh ICT Official ten an tawiawm a ni.