Vawiin chawhnu dar 1.00 khan Taxation Minister Pu Zodintluanga chuan tunhnaia GST hmanga chhiah lak dan chungchang zir tura Canada leh Japan rama Empowered Committee (EC) of State Finance/Taxation Minister te an zin kualna chungchangah MJA member-te a pisaah a kawm. GST hi bungrua leh khawl thathawh avanga bungraw hlutna lo awm (Goods & Services Tax) lak dan khawvel ram hrang hrang 140 a an hman mek a ni.

Pu Zodintluanga chuan Mizoram-a chhiah lak dan tur chungchanga zin an nih loh thu sawiin, “India ramah April 2013 atang khian chhiah lak dan chi thar GST chu hman ve tura ruahmanna a awm a; chuvang chuan India ram nena inhmeh ber tura ngaih Canada rama GST an kalpui dan chipchiar zir turin Empowered Committee-ah telh ve kan ni a. Japan rama chhiah an lak dante pawh kan zirchiang nghal bawk a; kan thil hmuh leh zirchhuahte chu Prime Minister leh Finance Minister te  hnena  thlen leh tur kan ni” a ti.  GST hmang tur chuan India ram Constitution siam rem a ngai dawn a; Parliament-ah pawh putluh a ni tawh a, Parliament-in  member hmun thuma thena hmun hnihin an  passed hnuah, State 28 zinga a zatve talin an remtihpui a ngaih tur thu pawh Pu Zodintluanga chuan a sawi bawk.

Taxation Minister Pu Zodintluanga bakah hian Principal Secretary (Taxation) Pu R.L. Rinawma leh Commissioner of Taxes Pu Lalthangliana Varte te chu EC ah hian palai an ni bawk a ni. An zinna sum senso hi Central sawrkar tum a ni a; Canada leh Japan rama an cham chhung hian Indian Embassy-in an lo thleng a ni.