Vawiin khan I&PR Conference Hall, Mamit-ah Right to Information Week 2012 hawn a ni a. He Week hi Pu V.Lalremthanga, District Bawrhsap-in hmanpuiin hawnna thu a sawi.
Pu V.Lalemthanga, District Bawrhsap chuan India ram hi khawvel ram ropuite zinga mi niin, hnam chi hrang hrang tam tak chenna a ni a, a chhunga cheng mipui tam takte hmasawnna tur hian Central Sawrkar chuan Scheme lianpui pui duangin sum tam tak a ruahman thin a, chu chu a nihna tur takah hman a nih theihnan leh mipuiten an chanvo dik tak an chan hi sawrkar duh dan a ni a ti a. An chanvo tura ruahman sum leh paite a nihna takah hman a nih leh nih loh hriatna atan RTI Act hi duan a ni a ti a; mipuite pawh in hei hi hmang tangkai turin kalkhawmte a chah bawk a. Sawrkar hnathawkte pawhin mipuiten an hriat duh an hriat theihna turin dik tak leh fel taka kan hna kan thawh a tul thu sawiin mipuite tana thawk kan ni tih hrenawn leh theuh turin officials te a chah bawk a ni.
He Week hawnna hman puitu, Pu Jim K.Chozah, Director, Information & Public Relations, Aizawl chuan RTI Act duan chhuah a nih dan leh he Act in a tum te sawiin, he Act hi sawrkar duan chhuah ni mahse la, a hmangtute chu mipui an ni a ti a. RTI hman dan leh hriat tur hrang hrangte sawifiahna leh zirtirna hun a hmang a ni.
He hunah hian zawhna leh chhanna hun buatsaih niin zawhnate chu Pu Jim K.Chozah, Director, Information & Public Relations hian a chhang a ni.
Inkhawm hi Pu C.Lalpeksanga, Project Director, DRDA, Mamit-in kaihruaiin Pu C.Lalnunkima, IPRO, Mamit-in lawmthu a sawi bawk a ni.
He RTI Week hawnna ah hian Mamit-a Heads of Offices, Department tina SPIO, SAPIO, tlawmngai pawl YMA, MHIP, MUP hruaitute, VC member te leh thuthar thehdarhtute an tel tha hle a ni.
