Vawiin khan Mizoram Sawrkar hnuaia Department of Information Communication Technology (ICT) leh National Institute of Smart Government (NISG) te tawngkawp in programme an duan Specialized Training for Smart Government (STEP) hnuaia Training ‘Government Process Re-Engineering (GPR)’ tih chu Aijal Club ah tan a ni a. Pu Zodintluanga, ICT Minister in he Training kar khat chhung awh tur hi a hawng a ni.
Pu Zodintluanga chuan Mizote hian computer hi kan hmelhriat ve hle tawh a, kan hmang nasa bawk a, mahse chutih rual in information technology-in awlsamna min siam hi kan la hmang tangkai tawk lo hle a ni a ti a. Information Technology (IT) tia kan sawi hian computer thahnem tak leia office a hun del dul hi a ni lo tih hi kan hriat a pawhmawh a ni a ti bawk. Minister chuan IT leh a kaihhnawih training ah te hian senior officer an tui lo tlat thin a, heng training te hi computer operator leh data entry operator te kal tawk velah an dah thin hian IT lama hmasawmna tur kan la ngahzia a pholangin ka hria a ni a ti.
Pu Zodintluanga chuan STEP zinga course pakhat Government Process Re-Engineering (GPR) hi thil pawimawh tak a tiin hei hian mipuiin sawrkar awlsam zawka an dawrtheih nan te, sawrkar hnathawk ten awlsam leh chak zawka an hna an thawh theih nan te leh langtlang sawrkar kan neih theih nan e-Governance chu laimu leh pui tu pawimawh tak mai a ni thu a sawi lang bawk.
STeP training hi a vawikhatna chu August thla tawp khan Project Management ah neih ani tawh a, Department hrang hrang atangin Officer 25 ten training an nei. GPR training pawh hi karkhat awhtur a ni a, NeGP hnuai SWAN leh CSC bultantu ten zirtirna an pe dawn a ni.
ICT Department hian Capacity Building Project under NeGP hnuai ah hian Officer 60 chuang NISG, Hyderabad ah leh IIPA, New Delhi ah te training in an kaltir tawh a. ICT Department hmalakna in e-Governance chungchangah kumkhat course eGPX chu TAPMI, Manipal atangin officer pali (4) in an zo tawh a. MLA te, Secretaries te leh Heads of Department te tan pawh e-Governance chungchangah workshop an lo buatsaih tawh thin bawk a. Tun thla tawp lamah hian STeP hnuaia tho Training dang ‘Business Model & Public Private Partnership’ neih a ni bawk dawn a ni.
