Vawiin khan TB enkawlna chungchangah 4th Quarter (October - December, 2012) Review Meeting chu Health Directorate Conference Hall, Dinthar-ah neih a ni.
He meeting hi Dr. Vanlalhruaii, State TB Officer in a kaihruai a. Dr. Guatom Borgohain. WHO Consultant chuan rawn hmanpuiin, India ram hmasawn chhoh zel leh hmalakna thar turte zirtirna a pe a. Dr. Harvey Vanlalpeka, Assistant Programme Officer (RNTCP) leh Dr. Zosangliani, Medical Officer (DOTS Plus) ten 4th Quarter 2012 chhunga State dinhmun te sawiin presentation an pe bawk.
October-December, 2012 chhunga TB vei thar hmuhchhuah zawng zawng chu mi 493 an ni a., an zinga mi 115 chu an khakah TB hrik hmuh an ni a, khaka TB hrik hmuh loh Chuap TB 98 awmin, Chuap pawnlam TB vei 190 lai an awm bawk. Kum 2012 chhunga TB hmuhchhuah zawng zawng chu 2337 an ni. Mizoramah hian Multi Drug Resistance TB (TB benvawn) mi 55 hmuhchhuah tawh niin, an zinga mi 47 te hian enkawlna an dawng mek a, kum hnih chhung nitin damdawi ei ngai a ni. Mi 6 te erawh chu an boral tawh thung a ni. Heng zinga a tam zawkte hi TB damdawi ei thatloh vanga MDR TB an ni.
He meeting-ah hian Sorkar laipui in TB chungchang thuchhuah a siam chu zirho a ni a. TB hi notifyable disease ah puan a nih tawh avangin Private Hospital/Laboratory/Private Practitioner zawng zawng ten TB vei an hmuhchhuah apiang District tina Nodal Officer (District TB Officer) te hnenah dan in aphut angin an hriattir ngei ngei tawh tur a ni a. Hemi bakah hian thisen atanga TB hmuhchhuahna Serodiagnostic Kit pawh hman khap a ni bawk.
He meeting-ah hian DHS a Programme Officer te leh District hrang hrang atangin Chief Medical Officers, District TB Officers, Medical Officers (TB Control) Senior Traetment Supervisor, Senior TB Laboratory Supervisor, DOTS Plus Supervisor, Accountant leh DEO an tel a ni.
