Ni hnih awh TB (Tuberculosis) enkawlna chungchanga thlirletna Review Meeting chu vawiin chawhma dar 10:00 khanAijal Club-ah Dr.Rohmingthanga Ralte, Director of Health Services  hova neih  a ni.      

Meeting hi Dr. Vanlalhruaii, State TB Officer in a kaihruai a, thla thum dana TB enkawlna chungchang thlir letna bahlah miah lova neih thin ani chu lawmawm a tih thu a sawi a. Tun kum January – September 2014 chhunga Mizorama TB enkawlna chungchang hetiang hian a sawi.

Dr. Rohmingthanga Ralte, Director pawhin thusawiin, Health department-a thawk te hi mipuite hriselna tura  thawkkannih avangin, mipuite hnenah hriselna lam zirtirnakanpek uar a ngai a. TB hi natna chi khat ve mai ani a, thin hrik lohva tha taka enkawl a pawimawh a. A enkawlna Revised National Tuberculosis Control Programme (RNTCP) pawh hi programme tha tak a ni a, a thawktute hian Central atanga facilities tha tak tak kan dawn avangin, taima tak leh tihtakzeta TB natna umbo tura kan thawh a pawimawh a, Sawrkar Laipuiin hriattirna (Notification) a tihchhuah tawh angin, Private Hospital leh Private-a clinic neite pawhin TB vei an lo hmuchhuak anih pawhin, RNTCP hnuaiah hriattir zel tur a ni. Hei hian TB natna dona kawngah nasa takin min pui thei dawn a ni, a ti.

Dr. Zosangliani, Asst. Programme Officer leh Dr. Vanzarliana, Medical Officer, STCS ten Power point presentation hmangin district tina Case hmuhchhuah leh enkawl te, Multi Drug Resistant-Tuberculosis (MDR-TB) vei enkawlna chungchangah presentation an pe a ni.

He review meeting-ah hian July – Sept 2014 chhunga TB vei hmuhchhuah chungchang chhui bingna neih ani a. District hrang hrang atanga report-a alandanin TB vei hmuhchhuah mi 541 an awm a, khaka TB hrik hmuhchhuah mi 207 an awm bawk. Enkawl dam 92% awmin, HIV leh TB vei kawp mi 42 an awm a, MDR-TB vei hmuhchhuah mi 10 an awm bawk.  

MDR-TB vei te hian MDR-TB bawk an thehdarh avangin damdawi ei mek zawng zawng ten MDR-TB an vei loh nan regular taka an ei a ngai a, mipui te pawhin  damlo reng reng kan  tlawhin awmsam taka inkaichhawn theih anih avangin fimkhur a ngai a ni.

He meeting-ah hian RNTCP hnuaia thawk mi 3 – Dr. H.B James, DTO Mamit, Lalchawimawia Laboratory Technician, Tuipang leh Johny Zairemmawia, Driver Champhai DTC te boral sunna hun hman a ni.

District hrang hrang atangin District TB Officers te bakah District PPM Coordinator, Senior Treatment Supervisors, Senior TB Laboratory Supervisors, Accountant, Laboratory Technician, Data Entry Operator  te an lo tel a, meeting hian naktuk thleng a awh ang.