Vawiin khan Health Directorate Conference Hall-ah TB  enkawlna chungchanga Review Meeting Dr. Rohmingthanga, Director of Health Services hova neih  a ni a. Dr.K.Lalbiakzuala, Mission Director, National Health Mission in a tel pui bawk.

Khuallian Dr. Rohmingthanga Ralte, Director of Health Services chuan thusawiin, TB enkawlna RNTCP hi programme tha tak a ni a, a thawktute hian Central atanga facilities tha tak tak an dawn avangin, taima tak leh tih takzeta TB natna umbo tura thawh a pawimawh a, hemi piah lamah mahni programme theuh hlawhtlinna tur  in Department khat a awm te  chu lungrual leh inthurual taka thawh tlan a pawimawh thu a sawi.

TB tihdam harsa bik MDR-TB vei te hmuhchhuah belh zel an nih avangin TB vei ten damdawi tha taka an ei a pawimawh a. Hetiang tur atana TB Programme hnuai a thawktu zawng zawng te in pekna chu fakawm atih thu leh RNTC chu National Health Programme kan neih te zing a meeting tha tak a nei leh regular ber an nih avangin fak tlak leh entawn tlak an nih thu Dr. Rohmingthanga'n a sawi a. Faina chungchangah pawh Swachh Bharat kalpui mek a ni chu lawmawm a tih thu leh natna tam tak kan vei te hi kan thianghlim tawk loh avang leh inthlahdahna avanga kai kan nih thu te, kan rilru sukthlek thlenga a thianghlim a pawimawh thu sawiin hemi lama hma kan sawn phawt chuan natna tam tak kan tawh thin te lak atangin kan lo him thei anga, kan lo hrisel zawk thei dawn a ni a ti bawk. India ram ah mihring za zel a 40 te hi TB hrik pai anga hriat a ni a, chutih laiin TB hi tha taka enkawlna lak chuan a dam leh mai thei anih hrerengin, TB vei te tih leh thin hrik hian awm zia a nei lo mai ni lovin, tha tak leh duat taka enkawlna pek tur an ni a ti.

Meeting hi Dr. Vanlalfela, State TB Officer  in a kaihruai a, thla thum dana TB enkawlna chungchang thlir letna bahlah miah lova neih thin a ni chu lawmawm a tih thu a sawi a. Kumin January – June 2015 chhunga Mizorama TB enkawlna chungchang hetiang hian a sawi :

Dr.K. Lalbiakzuala, Mission Director, National Health Mission pawhin thusawiin TB damdawi hi pawisa tam tak seng a lei ngai lovin, damdawi hi a thlawn vekin sawrkarin a pe a, India ram pum ah a enkawldan kalhmang pawh a in ang vek a nih thu leh Govt of India in Notification a tihchhuah tawh angin, Private Hospital leh Private-a clinic neite pawhin TB vei an lo hmuchhuak anih pawhin, RNTCP hnuaiah hriattir zel tur a niin hei hian TB natna dona kawngah nasa takin a pui thei dawn a ni a ti bawk. TB natna umbo tur hian zavai a tan tlan a ngaih thu leh natna reng reng midangte tawrh tur bik ah ngawt dah lovin,kanchung a thleng ve thei vek ani tih hria a, a te ber atanga lian ber thlengin kan tan tlan mar pat reng a tul takzet thu a sawi.

Dr. Vanzarliana, Medical Officer, STCS leh Dr. Albert Lalhminghlua, Medical Officer, DR- TB Centre ten Power point presentation hmangin district tina Case hmuhchhuah leh enkawl te, MDR-TB vei enkawlna chungchangah presentation an pe a ni.

He review meetingah hian April – June 2015 chhunga TB vei hmuhchhuah chungchang chhui bingna neih a ni a. District hrang hrang atanga report-a a landanin TB vei hmuhchhuah leh enkawl mi 539 an awm a, khak-a TB hrik hmuhchhuah mi 216 an awm bawk. Enkawl dam 83% awmin, HIV leh TB vei kawp mi 39 an awm a, MDR-TB vei hmuhchhuah mi  15 an awm bawk.

He meeting-ah hian District hrang hrang atangin District TB Officers, Senior Treatment Supervisors, Sr. DOT Plus Supervisor, Senior TB Laboratory Supervisors leh DEO te an lo tel a ni. WHO atang pawhin Consultant, Dr. Gautam Borgohain a lo tel bawk.