Nimin nileng khan Aijal Club-ah TB enkawlna chungchanga Review Meeting (4th Quarter 2017) neih a ni a. He meeting hi Dr. Lalrozama IAS, Mission Director, National Health Mission hova neih niin chawhnuah Project Nauban leh Project Red Cap zirbingna atanga thil hmuhchhuah puanzarna hun an hmang a. Health Minsiter Pu Lal Thanzara chu khuallian a ni.

Health Minister Pu Lal Thanzara chuan HIV/AIDS leh TB chu khawvelin natna a buaipui berte zinga mi, natna inkaihhnawih tlat a ni a, TB dona kawngah Mizoram chuan hma sawn tawh viau mahse HIV/AIDS erawh a darh chak a, kai thar an awm belh zel hi a lungchhiat thlak hle a ni, a ti. Jail tangte leh drugs a inchiu thin te zingah mithiamten heng natna chungchang zirbingna an kalpui atanga an zirchhuah hmang hian India rama TB natna zirchianna atana sum tumtu Central TB Division (CTD) chuan an hmalakna siam that an tum a, hei hian he zirbingna pawimawhzia a ti langchiang hle, a ti a. Heng research pahnih atanga mithiamte hmuhchhuah atangte hian heng natna hlauhawm tak AIDS/HIV leh TB natna dona kawngah bung thar Mizoramin a kai a beisei thu a sawi a ni. Health Minister chuan NITI Aayog-in rampuma hriselna zirchhiana ‘Healthy India, Progressive India’ Report tunhnaia a tihchhuahah, State tenau (Smaller States) zinga pakhatna dinhmun Mizoramin a luah chu hriselna kawnga thawktu zawng zawngte inpekna leh mipui ten sawrkar an thawhpui that vang a ni tih sawiin tha thlah lova hriselna atana ke pen zel turin thawktute leh mipuite a sawm a ni.

Project Nauban kaltlang hian Indian Council of Medical Research chuan Digital X-Ray khawl, cheng nuai sawm (10 Lakhs) man a lei a, hei hi Central Jail-ah  dah a ni. He research neih chhung hian Jail tang mi 738 (Mipa-626, Hmeichhia-112) te chu endik an ni a. Zirchianna atanga thil pawimawh tak lo lang te chu :-Jail tang te hi hmun chep taka awm khawm an nih avangin natna in kai darh a awlsam a. Chuvangin chutiang inkaidarh laka invenna atana hmalakna mumal takte, Jail tang zingah TB leh HIV vei te hmuhchhuah thuai an nih theih nan hmanrua leh tul dangte ngaihtuahte, HIV leh TB laka Jail tangte an him theihna tura invenna lama hmalakna neih te, HIV leh TB vei an awm pawha enkawlna pek thuai an nih theih nan, ART for HIV+ leh ATT for TB patient enkawlna te hi a hmunah pek theih a tul niin an hria a. Research dang – Project Red Cap atang hian IDU tam zawk hian an hriselna an ngaihthah a, TB natna phei chu an ngaihven pha meuh lo tih te, IDU tam zawk hian Health Care provider an pan hreh a, an damloh pawhin a tlai fe hnua pan an ni fo thin. Chuvangin TB vei pawh nise hriat chhuah mai ngaihna a awm lo hle tih leh  IDU leh vulnerable population dangte tan bik hian TB program hi her rem theih ni se, a vei te hriat chhuah leh enkawl kawngah hma kan sawn an beiseiawm hle tih an zirchhuak a ni.

 Jan – Dec 2017 chhunga Mizorama TB dinhmun tlangpui te chu:

1.      TB vei nia rinhlelh exam zawng zawng    -           8129

2.      TB vei hmuhchhuah zat                              -           1931

3.      MDR-TB vei nia rinhlelh exam zat           -          2568

4.      MDR-TB vei hmuhchhuah zat                   -           68

5.      TB-HIV rinhlelh exam zat                          -           1725

6.      TB-HIV vei hmuhchhuah zat                     -           131

TB enkawl dan chungchangah hian hmalakna thar a awm nual a. TB vei ten MDR-TB an vei leh vei loh endikna Universal Drug Susceptibility Testing chu Sep 2017 atang khan hman tan a lo ni tawh a. Hei hi TB vei hmuhchhuah thar apiangah endik nghal zel tur a ni. TB damdawi chawlhkar khata vawi thum ei thin chu sawrkar laipui thu chhuah angin nitin eia thlak danglam a ni a. Hei hi Oct 2017 atang khan kalpui tan a ni. Sawrkar laipuiin kum 2025-ah TB natna umbo a nih theih nana hmalakna pakhat atan TB vei damlo zawng zawngte hnenah tanpuina thlatin Rs. 500 pekna tur a ruahman mek bawk.

Nimin vek khan Central TB Division in Mizoram sawrkar hnena Medical Mobile Van a pek chu Health Minister, Pu Lalthanzara’n a hawng nghal a. He Mobile Van hi Mizoram chhunga TB vei te rang tak leh awlsam taka hmuhchhuah an nih theih nana hman tur a ni. He mobile Van chhungah hian CBNAAT khawl (Khak exam-na,) Air Conditioner, Generator, UPS, Lap top, Printer, Refrigerator, Wash Basin- te a awm a ni.