Vawiin khan  Mamit District Hospital Blood Bank leh Association for Voluntary Blood Donation(AVDB) Mamit tawngkawpin Valentines Day pualin Mamitah thisen pek runpui neih a ni. 

Hemi pual inkhawm tawi hi District Hospital OPD tualzawla neih niin Dr B. Hmingthansanga, Blood Bank Officer ( BBO) chuan a kaihruai a,  Dr Lalliannghaka District Medical Superintendent (DMS) chuan thu sawiin, vawiin ni danglam bik ah hian hmangaihte tana luanchhuahna ni a nih angin midangte tana malsawmna ni tura thilpek hlu ber kan thisen hmanga kan hmangaihna kan lantir tur hi a ropui hle a, chutiang ti thei tura hun tha kan tawng chu kan vannei hle a ni a ti. Damlo a mamawhtute tana thisen pekna kawngah AVBD, Mamit Branch te tawiawmna-ah lawmthu sawiin, hmalam hunah pawh lungrual taka thawk tlang zel turin a sawm a ni. 

DMS chuan Mamit District Hospital chu thuam that chhoh mek zel a ni a, khawl thar changkang leh tha tak tak neih thar niin, a enkawl thiam bik tur Doctor Aizawlah training tura intirh mek a ni a, tum anga awm chuan kumin April thla velah chuan damlote tan khawl thar hmangin Mamit Hospital-ah ngei khawchhung leh ruh lam en theih a nih  dawn thu a sawi a ni. 

Pu Lalmakthanga Secretary, AVBD chuan report pe-in Ni 23 Nov 2010 khan AVBD, Mamit Branch hi din niin a mamawhtute tana thisen pe tura inzirtirna College/Sikul leh YMA Branch hrang hrangah te neih thin a ni a, Thisen pe tha pawl leh mimalte hnenah chawimawina hlan thin a ni bawk. Kum 2012 atang khan Mamit khawpui chhunga YMA Branch parukte chuan Calendar neiin a inchhawkin thisen an pe thin a ni. 

Pu Zonunmawia Lab Technician, Blood Bank Mamit pawhin report pe-in Pu Vanlalchhuanga President AVBD, Mamit in lawmthu sawiin hun a khar a ni. 

Vawiin Valentines Day puala thisen pek runpuiah hian Mamit khawpui chhunga thalai thahnem tak te’n a mamawh apiangte hman turin thisen an pe a, thisen petute hi rose par sen hlan vek an ni bawk.